Një sulm i ri ka përshkallëzuar ndjeshëm tensionet në Lindjen e Mesme, pasi Emiratet e Bashkuara Arabe akuzojnë Iranin për goditje të drejtpërdrejta me dronë dhe raketa ndaj infrastrukturës së tyre energjetike.
Një zjarr i madh shpërtheu në portin strategjik të Fujairah, pasi një dron goditi objektin, ndërsa tre shtetas indianë mbetën të plagosur. Paralelisht, autoritetet emirate njoftuan se kishin kapur tre raketa të lëshuara nga Irani, ndërsa një tjetër përfundoi në det.
Sulmi nuk ishte i izoluar. Një tanker i lidhur me Adnoc u raportua se ishte goditur në Ngushtica e Hormuzit, një nga nyjet më kritike të furnizimit global me energji. Emiratet e cilësuan zhvillimin si një “përshkallëzim të rrezikshëm”.
Teherani mohoi përfshirjen, duke i quajtur akuzat “krejtësisht të rreme” dhe duke deklaruar se nuk kishte në plan të synonte Emiratet. Në të njëjtën kohë, tensioni u rrit edhe mes Iranit dhe SHBA-së, me pretendime të ndërsjella për incidente detare dhe përplasje në Hormuz.
Donald Trump deklaroi se forcat amerikane kishin neutralizuar disa mjete detare iraniane, një pretendim i mohuar nga Teherani. Ndërkohë, ushtria iraniane tha se kishte qëlluar pёr tё paralajmëruar ndaj një anijeje amerikane.
Në terren, situata është bërë kritike. Ngushtica e Hormuzit — përmes së cilës kalon rreth 20% e naftës dhe gazit të lëngshëm në botë — mbetet praktikisht e bllokuar që prej fillimit të konfliktit SHBA-Iran në shkurt. Mijëra detarë dhe mijëra anije kanë ngecur, ndërsa rrugët tregtare janë paralizuar.
Pasojat ekonomike janë të menjëhershme. Çmimi i naftës Brent kaloi 115 dollarë për fuçi, duke reflektuar frikën globale për ndërprerje të furnizimit. Edhe pse porti i Fujairah ofron një rrugë alternative për eksportet e naftës nga Abu Dhabi, kapacitetet janë të kufizuara dhe nuk mund të kompensojnë plotësisht bllokimin e Hormuzit.
Në këtë klimë tensioni, SHBA-të kanë paralajmëruar ndërhyrje për të nxjerrë anijet e bllokuara, duke mos përjashtuar përdorimin e forcës nëse operacioni pengohet.
(Burimi: BBC)
