Njё Urdhёr i botuar sot në Fletoren Zyrtare shpalos faktin se ministri i Brendshëm Besfort Lamallari ia kalon zëvendësministres Anisa Ruseti të drejtën për të firmosur marrëveshjen me Korporatёn e Investimeve Shqiptare për projektin “Qendra për Zhvillimin Multifunksional, Tiranë”.
Por pjesa tjetër e urdhrit qё ia kanё servirur Lamallarit pёr nёnshkrim, rrëzon menjëherë këtë “distancim”. I njëjti akt detyron Policinë e Shtetit të dorëzojë pronat, detyron Gardën dhe strukturat e tjera të bashkëpunojnë, të japin specifikime teknike dhe të zbatojnë marrëveshjen në çdo hap.
Ajo qё ministri i brendshёm synon ta kalojё lehtё thjesht si procedurё, ёshtë nё fakt një mënyrë për të mos e vendosur emrin drejtpërdrejt mbi një akt të rëndë, tё cilit i trembet. Ndërkohë që vendimi dhe pasojat e tij mbeten të plota e rёndojnё po mbi tё, sepse delegimi nuk e heq përgjegjësinë — vetëm e zhvendos firmën në letër.
Megjithatё, ky Urdhёr nxjerr hapur një klimë që deri tani flitej nën zë: marrëdhënia me Korporatën e Investimeve nuk shihet më si një akt i zakonshëm administrativ. Është bërë një proces ku institucionet hyjnë, por me kujdes të dukshëm për të mos u ekspozuar, kur nuk i shmangen dot.
Ministri nuk firmos vetë, por është ai që urdhëron, ai që ngarkon institucionet dhe ai që vë në lëvizje gjithë mekanizmin. Në praktikë, marrëveshja mbetet e tij.
Ky është paradoksi i urdhrit qё ka firmosur Lamallari: përpjekja për të ulur përgjegjësinë e bën atë edhe më të dukshme.
Në një projekt ku përfshihen prona shtetërore, struktura sigurie dhe një nga instrumentet më të forta të qeverisë si Korporata qё tregton pronat e shtetit, askush nuk mund të qëndrojë realisht jashtë. Urdhri e thotë qartë — edhe kur firma e tij nuk është aty, ndёrsa Lamallari mendon “se ia hodhi” Rusetit pёr kёtё herё pёrgjegjёsinё.
© Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
