Autoritetet shëndetësore në disa vende të botës kanë nisur një operacion urgjent gjurmimi për dhjetëra pasagjerë që zbritën nga anija turistike MV Hondius përpara se të konfirmohej shpërthimi i hantavirusit, një virus i rrallë dhe potencialisht vdekjeprurës që deri tani lidhet me të paktën tre viktima.
Sipas të dhënave të publikuara të enjten, të paktën 29 pasagjerë nga 12 shtete të ndryshme u larguan nga anija më 24 prill, vetëm pak ditë pas vdekjes së parë në bord dhe përpara se të vendoseshin masat e izolimit.
Tashmë autoritetet në Europë, SHBA, Azi dhe Australi po përpiqen të identifikojnë lëvizjet e tyre dhe kontaktet që kanë pasur që nga kthimi në vendet respektive.
Megjithatë, Organizata Botёrore e Shёndetёsisё ka kërkuar të shmangë panikun, duke theksuar se situata nuk ka ngjashmëri me fillimin e pandemisë Covid-19.
“Ky nuk është fillimi i një epidemie. Ky nuk është Covid”, deklaroi Dr. Maria Van Kerkhove, drejtore e OBSH-së për përgatitjen ndaj epidemive dhe pandemive.
Deri tani janë konfirmuar pesë raste me hantavirus nga tetë të dyshuara, ndërsa OBSH paralajmëroi se mund të shfaqen raste të tjera për shkak të periudhës së gjatë të inkubacionit, e cila mund të zgjasë deri në gjashtë javë.
Hantavirusi është një grup virusesh që zakonisht transmetohen nga brejtësit, por varianti i Andeve — që dyshohet në këtë rast — mund të përhapet edhe mes njerëzve përmes kontakteve shumë të afërta. Sëmundja mund të shkaktojë simptoma të rënda respiratore dhe dështim të mushkërive. Aktualisht nuk ekziston vaksinë.
Në Hollandё po trajtohen tre persona që u evakuuan nga anija, mes tyre një mjek 41-vjeçar, një pasagjer gjerman 65-vjeçar dhe udhërrëfyesi britanik i ekspeditës, Martin Anstee. Autoritetet holandeze konfirmuan gjithashtu se një grua që nuk kishte qenë në bord po mbahet në izolim në një spital në Amsterdam, pasi shfaqi simptoma të mundshme të virusit.
Nëse testi i saj rezulton pozitiv, ajo do të ishte personi i parë i njohur i infektuar jashtë anijes.
Kompania Oceanwide Expeditions deklaroi se pasagjerët që zbritën në ishullin Saint Helena janë kontaktuar, por shumica prej tyre besohet se tashmë janë kthyer në vendet e origjinës.
“Amerikanët janë kthyer në SHBA, britanikët në Angli, australiani në Australi, tajvanezi në Tajvan”, deklaroi një pasagjer spanjoll për gazetën El País.
Në Zvicёr një burrë që kishte qenë në anije rezultoi pozitiv dhe po trajtohet në një spital në Zyrih, ndërsa në SHBA, Qendrat për Kontrollin dhe Parandalimin e Sëmundjeve po monitorojnë pasagjerë që janë kthyer në shtete si California, Arizona dhe Georgia.
Në Angli dy pasagjerë janë vetëizoluar, ndërsa autoritetet britanike paralajmërojnë se personat që kanë qenë në bord mund të duhet të qëndrojnë në karantinë deri në 45 ditë.
Ndërkohë, vetë anija MV Hondius, me 149 persona ende në bord, është larguar nga ujërat e Cape Verde pasi iu refuzua ankorimi dhe po lundron drejt Tenerifeve, ku pritet të mbërrijë të dielën.
Autoritetet europiane po përgatisin tashmë operacionet e evakuimit për qytetarët e BE-së që ndodhen në bord.
Hetimet po përqendrohen gjithashtu te origjina e shpërthimit. Një nga teoritë kryesore lidhet me një ekspeditë vëzhgimi zogjsh në Argjentinё ku kishte marrë pjesë çifti holandez që rezultoi mes viktimave të para. Argjentina ka incidencën më të lartë të hantavirusit në Amerikën Latine dhe ka raportuar mbi 100 raste vetëm gjatë vitit të fundit.
(Burimi: The Guardian)
