Një shekull pas lindjes së Marilyn Monroe, bota po rikthehet tek miti i gruas që u kthye në simbolin më të madh të sensualitetit dhe famës në Hollywood, por që pas buzëqeshjes ikonike fshehte pasiguri, vetmi dhe një jetë emocionale të trazuar.
Me rastin e 100-vjetorit të lindjes së saj, që shënohet më 1 qershor, në Los Angeles do të dalin në ankand dhjetëra objekte personale, letra private dhe dokumente të pabotuara më parë që zbulojnë një Marilyn shumë ndryshe nga imazhi publik i “bombës seksuale” të ekranit.
Shtëpia e ankandeve Heritage do të nxjerrë në shitje rreth 80 artikuj nga koleksioni privat i Norman dhe Hedda Rosten, dy prej miqve më të afërt të aktores gjatë viteve të fundit të jetës së saj. Mes objekteve ndodhen letra intime, shënime personale, vizatime dhe reflektime mbi dashurinë, poezinë dhe ankthin që e shoqëronte vazhdimisht.
Vetëm pak ditë më vonë, edhe Julien’s Auctions, në bashkëpunim me Turner Classic Movies, do të organizojë një tjetër ankand gjigant me afro 200 objekte të lidhura me jetën e Monroe. Në katalog përfshihen fotografi të papublikuara, skenarë me shënimet e saj personale, kozmetikë, veshje dhe sende të përditshme që japin një pamje intime të yllit legjendar.
Ndër objektet më të komentuara është një çantë mbrëmjeje ngjyrë ari, e vlerësuar rreth 100 mijë dollarë, ku ende ndodhen buzëkuqi, pasqyra, pudra, cigare dhe disa monedha të vogla – sikur Marilyn sapo ta kishte lënë mbi tavolinë.
Po ashtu do të shitet edhe një orë tavoline Fabergé, dhuratë nga ish-bashkëshorti i saj Joe DiMaggio, si dhe kostumi Christian Dior që ajo veshi gjatë nisjes për muajin e mjaltit në Japoni në vitin 1954.
Por pjesa më tronditëse e materialeve lidhet me martesën e saj me dramaturgun legjendar Arthur Miller.
Një letër tetëfaqëshe e pabotuar më parë, që do të dalë në ankand me çmim fillestar 50 mijë dollarë, përmban reflektime të dhimbshme të Miller mbi marrëdhënien e tyre.
“Doja të ishe e lumtur, por po të shoh të shkatërrohesh dalëngadalë… dhe nga unë”, shkruan ai në letër, duke pranuar tensionin emocional që kishte pushtuar martesën e tyre.
Sipas miqve të Marilyn, letra ishte aq e fortë emocionalisht sa pjesët identifikuese u hoqën për vite të tëra nga frika se mos përfundonin në tabloidet amerikane.
Në të njëjtën kohë, një libër i ri me transkripte të bisedave private të Miller me biografin Christopher Bigsby po hedh dritë mbi marrëdhënien e tyre komplekse. Në to, dramaturgu pranon se ndiente se “vdekja ishte gjithmonë mbi supet e Marilyn” dhe se kishte frikë se ajo po shkonte drejt një “fundi katastrofik”.
Pas më shumë se gjashtë dekadash nga vdekja e saj misterioze në vitin 1962, Marilyn Monroe vazhdon të mbetet një nga figurat më magnetike dhe tragjike të kulturës pop globale – një grua që pushtoi botën me imazhin e saj, ndërsa në jetën private luftonte me brishtësinë, famën dhe vetminë.
