Një student amerikan, i cili u zhduk gjatë pushimeve familjare në Japoni, është gjetur i pajetë pas disa ditësh kërkimesh intensive në zonat malore pranë Kiotos.
James “Weston” Higginbotham, 20 vjeç, student në vitin e tretë në Universitetin Auburn dhe i apasionuar pas mjedisit, po udhëtonte me familjen e tij në Japoni kur humbi gjurmët më 29 maj.
Sipas familjes, pak para zhdukjes ai kishte pasur një debat me të ëmën lidhur me përdorimin e ChatGPT për orientim gjatë udhëtimit. Weston, i cili ishte i shqetësuar për ndikimin që teknologjitë e inteligjencës artificiale kanë mbi burimet natyrore, vendosi të ndahej nga familja dhe të eksploronte i vetëm qytetin e Kiotos.
Prindërit e tij e ndoqën fillimisht përmes aplikacionit Life360, i cili tregonte se ai kishte hipur në tren dhe kishte vizituar disa dyqane. Kur e pyetën me mesazh se ku po shkonte, vendndodhja e tij u çaktivizua pak më vonë, një veprim që sipas familjes nuk ishte aspak karakteristik për të.
Pamjet e fundit të regjistruara nga kamerat e sigurisë e tregojnë Weston rreth orës 20:00 të mbrëmjes së 29 majit duke ecur vetëm në zonën Yamashina, në kufirin mes prefekturave Kyoto dhe Shiga. Bëhej fjalë për një rajon malor dhe të pyllëzuar, pranë shtigjeve të ecjes.
Familja njoftoi autoritetet për zhdukjen e tij rreth orës 02:00 të mëngjesit të 30 majit.
Në ditët që pasuan, nëna e tij, Nancy Higginbotham, nisi një fushatë në rrjetet sociale për të gjetur informacione, duke publikuar thirrje në Facebook dhe Reddit.
Më 2 qershor, policia konfirmoi informacionet e marra nga kamerat e sigurisë dhe nisi kërkimet në pyll, duke u përballur me kushte të vështira moti për shkak të stuhive dhe reshjeve të dendura.
Një ditë më vonë, dhjetëra efektivë policie, qen gjurmues dhe helikopterë u angazhuan në kërkime në zonat malore pranë Yamashinës.
Më 5 qershor përfundoi operacioni policor 72-orësh, ku morën pjesë më shumë se 100 efektivë, por pa rezultat. Familja vendosi më pas të financojë vetë një operacion të ri kërkimi, duke angazhuar një ekip privat shpëtimi dhe vullnetarë vendas.
Më 6 qershor, prindërit e Weston u takuan me ekipet e kërkimit dhe banorë të zonës për të vijuar kontrollin në pjesët e pyllit që nuk ishin kontrolluar nga policia.
“E dimë që ndodhet diku në këto pyje”, shkroi nëna e tij në Facebook të shtunën në mëngjes.
Por vonë atë natë erdhi lajmi tragjik.
Familja njoftoi se trupi i Weston ishte gjetur nga një grup vullnetarësh të kërkim-shpëtimit në një zonë malore jashtë Kiotos.
“Dhimbja që ndiejmë është e pamundur të përshkruhet me fjalë”, thuhej në deklaratën e familjes.
Rrethanat e sakta të vdekjes së 20-vjeçarit nuk janë bërë ende publike, ndërsa autoritetet japoneze vijojnë hetimet.
Burimi: CNN
