Venezuela po përjeton një nga katastrofat më të rënda natyrore në historinë e saj moderne, pasi dy tërmete shumë të fuqishme goditën bregdetin verior të vendit, duke lënë të paktën 164 persona të vdekur dhe 971 të plagosur, sipas bilancit më të fundit të autoriteteve.
Presidentja në detyrë, Delcy Rodríguez, paralajmëroi se numri i viktimave pritet të rritet ndjeshëm, ndërsa ekipet e shpëtimit vazhdojnë të kërkojnë të mbijetuar nën rrënojat e dhjetëra ndërtesave të shembura.
Tërmeti kryesor me magnitudë 7.5 ballë goditi vetëm 39 sekonda pas një lëkundjeje paraprake prej 7.2 ballësh, duke shkaktuar dëme të mëdha në Karakas dhe përgjatë vijës bregdetare. Sipas sizmologëve, bëhet fjalë për tërmetin më të fuqishëm që ka goditur Venezuelën në më shumë se një shekull.
Pamjet që vijnë nga kryeqyteti Karakas tregojnë ndërtesa të shembura, rrugë të mbuluara nga rrënojat dhe qindra ekipe emergjence që punojnë pa ndërprerje në kërkim të të mbijetuarve. Një kullë 14-katëshe është rrafshuar plotësisht, ndërsa banorët presin me ankth lajme për familjarët e zhdukur.
Provinca bregdetare La Guaira konsiderohet zona më e goditur. Autoritetet e kanë shpallur rajonin zonë fatkeqësie, ndërsa hotele, banesa dhe objekte publike janë kthyer në grumbuj betoni.
Frika nga pasgoditjet ka detyruar mijëra banorë të kalojnë natën në makina ose në ambiente të hapura, duke refuzuar të rikthehen në banesat e dëmtuara.
Situata humanitare po bëhet gjithnjë e më e vështirë. Shumë zona kanë mbetur pa ujë të pijshëm, ndërprerjet e energjisë elektrike janë të vazhdueshme, interneti funksionon me vështirësi, ndërsa furnizimi me gaz është pezulluar për të shmangur shpërthime të mundshme.
Edhe infrastruktura publike ka pësuar goditje të rëndë. Aeroporti Ndërkombëtar “Simón Bolívar”, i ndodhur në zonën më të prekur, është mbyllur, ndërsa shërbimi i metrosë dhe hekurudhave është pezulluar. Gjykata e Lartë ka ndërprerë aktivitetin, ndërsa shkollat janë mbyllur dhe shumë prej tyre janë shndërruar në qendra strehimi dhe grumbullimi ndihmash.
Miliona venezuelianë që jetojnë jashtë vendit po përpiqen të kontaktojnë familjarët e tyre, por ndërprerjet e komunikimeve po e bëjnë këtë tepër të vështirë. Mesazhet që mbërrijnë nga zonat e goditura përshkruajnë skena dramatike, me persona që janë nxjerrë të gjallë nga rrënojat pas shumë orësh.
Ndërkohë, ndihma ndërkombëtare ka nisur të mbërrijë në Venezuelë. Shtetet e Bashkuara kanë dërguar ekipe kërkim-shpëtimi dhe do të ofrojnë imazhe satelitore për vlerësimin e dëmeve. Italia, Spanja, Franca dhe Zvicra kanë njoftuar gjithashtu dërgimin e ekipeve të specializuara për operacionet e kërkim-shpëtimit.
Katastrofa vjen në një moment veçanërisht të vështirë për Venezuelën, e cila prej vitesh përballet me krizë të thellë ekonomike dhe politike. Qeveria ka bërë të ditur se po bashkëpunon me institucionet financiare ndërkombëtare për krijimin e një fondi emergjent prej 200 milionë dollarësh, me synim përballimin e pasojave të para të katastrofës.
Autoritetet vazhdojnë të paralajmërojnë qytetarët për rrezikun e pasgoditjeve, ndërsa ekipet e emergjencës po punojnë pa ndërprerje në përpjekje për të gjetur sa më shumë të mbijetuar nën rrënoja. Bilanci i tragjedisë pritet të rëndohet në orët dhe ditët në vijim.
