Nëse keni lindur mes viteve 1993 dhe 1998, ka shumë gjasa t’i përkisni brezit më me fat të tregut modern të punës. Të quajtur “Zillennials”, ata u rritën në një botë pa telefona inteligjentë, por hynë në karrierë pikërisht në momentin kur teknologjia dhe inteligjenca artificiale po ndryshonin gjithçka.
Ky kombinim po rezulton një avantazh i madh. Ata janë mjaftueshëm të rritur për të kuptuar si punohej para revolucionit digjital, por edhe mjaftueshëm të rinj për të përvetësuar natyrshëm inteligjencën artificiale. Në një kohë kur kompanitë kërkojnë punonjës që dinë jo vetëm të përdorin AI, por edhe ta drejtojnë dhe ta vlerësojnë atë, ky brez duket se ka qëlluar në vendin dhe kohën e duhur.
Edhe tregu i punës po e konfirmon këtë prirje. Punonjësit që zotërojnë aftësi në inteligjencën artificiale paguhen ndjeshëm më mirë, ndërsa gjithnjë e më shumë vende pune kërkojnë aftësi si mendimi kritik, gjykimi dhe vendimmarrja, jo thjesht njohuri teknike.
Ndryshe nga shumë Millennials që nisën karrierën gjatë krizës financiare të vitit 2008 apo pjesa më e re e Gjeneratës Z që u përball me pandeminë, Zillennials arritën të ndërtonin bazat e karrierës së tyre përpara këtyre goditjeve ekonomike. Kjo u ka dhënë një avantazh që sot po reflektohet në paga, mundësi punësimi dhe zhvillim profesional.
Madje, ekspertët besojnë se historia mund të përsëritet me Gjeneratën Alpha, fëmijët që sot po rriten së bashku me inteligjencën artificiale. Nëse shkollat arrijnë t’i mësojnë të përdorin AI pa humbur aftësinë për të menduar në mënyrë të pavarur, ata mund të jenë brezi i ardhshëm që do të dominojë tregun e punës.
Burimi: Fortune
