Qeveria gjermane ka miratuar një nga reformat më të debatueshme të tregut të punës, duke vendosur rregulla shumë më të rrepta për raportet mjekësore. Në kuadër të paketës së reformave për rritjen e produktivitetit dhe ringritjen e ekonomisë, punonjësit që deklarojnë se janë të sëmurë do të duhet të paraqiten fizikisht te mjeku që në ditën e parë të mungesës në punë.
Masa e re, e propozuar nga kancelari Friedrich Merz, i jep fund praktikës së deritanishme, sipas së cilës punonjësit mund të merrnin raport mjekësor vetëm përmes një telefonate dhe nuk ishin të detyruar ta paraqisnin atë deri në ditën e tretë të mungesës.
“Numri i ditëve të mungesës për shkak të sëmundjeve është shumë i lartë,” deklaroi Merz. “Po krijojmë një paketë masash që do t’u mundësojë si punonjësve, ashtu edhe kompanive, të korrigjojnë këtë situatë. E dimë që është një vendim i vështirë, por Gjermania nuk mund të përballojë më disavantazhin konkurrues që shkaktohet nga mungesat e zgjatura në punë.”
Reforma është pritur pozitivisht nga organizatat e biznesit, të cilat prej kohësh kanë kërkuar kontroll më të madh mbi mungesat për arsye shëndetësore. Në krahun tjetër, sindikatat e kanë cilësuar vendimin si një goditje ndaj besimit mes punëdhënësve dhe punonjësve.
Kreu i sindikatës së sektorit të shërbimeve Verdi, Frank Werneke, akuzoi qeverinë se po krijon “një kulturë mosbesimi ndaj punonjësve”.
Edhe mjekët e familjes kanë reaguar ashpër, duke paralajmëruar se ndryshimi do të mbingarkojë sistemin shëndetësor.
“Ambulatorët tanë do të mbushen me pacientë që nuk kanë nevojë për vizitë fizike dhe që do të ishte më mirë të qëndronin në shtrat,” deklaroi Shoqata Gjermane e Mjekëve të Familjes, e cila e quajti masën “një katastrofë absolute”.
Sipas statistikave, një punonjës në Gjermani merr mesatarisht rreth 15 ditë leje mjekësore në vit, ose afërsisht tre javë. Ky nivel është më i ulët se në Francë dhe shumicën e vendeve nordike, por më i lartë se në Suedi, Holandë, Danimarkë, Poloni dhe Itali.
Në Britaninë e Madhe, për krahasim, punonjësit nuk janë të detyruar të paraqesin raport mjekësor deri pas shtatë ditësh mungesë nga puna.
Rregullat e reja për raportet mjekësore janë pjesë e një pakete më të gjerë reformash ekonomike të dakordësuara mes partisë së qendrës së djathtë të Merz dhe partnerëve socialdemokratë në qeveri.
Paketa përfshin gjithashtu uljen e burokracisë, rritjen graduale të moshës së daljes në pension nga 67 deri potencialisht në 70 vjeç në dekadat e ardhshme, si dhe ulje taksash për shtresën e mesme, të financuara përmes rritjes së tatimit për të ardhurat mbi 250 mijë euro në vit.
Ekonomisti Carsten Brzeski nga banka holandeze ING e cilësoi paketën si “fillimin e shumëpritur të verës së reformave në Gjermani”.
“Sigurisht që këto masa nuk do ta kthejnë ekonominë gjermane nga stanjacioni në rritje brenda natës. Por ato mund të krijojnë kushtet dhe bazën për një rimëkëmbje të qëndrueshme në vitet e ardhshme,” u shpreh ai.
Burimi: Telegraph
