Presidenti amerikan Donald Trump ka përshkallëzuar përplasjen publike me kryeministren italiane Giorgia Meloni, duke publikuar në rrjetin e tij social Truth Social një imazh të manipuluar, të shoqëruar me mbishkrimin: “Duhet një urdhër mbrojtjeje” (“Restraining order needed”), duke lënë të kuptohet se Meloni ishte tepër e interesuar për të.
Postimi vjen vetëm pak ditë para samitit të NATO-s që do të mbahet në Turqi, ku Trump dhe Meloni pritet të marrin pjesë së bashku me liderët e tjerë të aleancës.
Përplasja nisi javën e kaluar, kur Trump pretendoi se gjatë samitit të G7, Meloni i kishte kërkuar vazhdimisht të bënin një fotografi së bashku, duke deklaruar se ajo ia kishte kërkuar këtë “herë pas here”.
Meloni e hodhi poshtë kategorikisht pretendimin, duke e cilësuar atë “plotësisht të sajuar”.
“Italia dhe unë nuk i lutemi askujt,” deklaroi kryeministrja italiane për televizionin Rete 4.
“Nuk jam antiamerikane sot dhe nuk kam qenë e përulur dje. Jam një person që beson se Perëndimi është më i fortë kur është i bashkuar, beson se Italia është më e fortë brenda një Perëndimi të bashkuar dhe kam punuar e vazhdoj të punoj për këtë. Por marrëdhëniet e forta ndërtohen edhe mbi sinqeritetin dhe unë jam një person i drejtpërdrejtë,” u shpreh ajo.
Tensionet mes dy liderëve kanë sjellë pasoja edhe në marrëdhëniet diplomatike. Ministri i Jashtëm italian, Antonio Tajani, anuloi një vizitë të planifikuar në Uashington.
Sipas mediave italiane, marrëdhëniet mes Trump dhe Melonit janë ftohur ndjeshëm javët e fundit, edhe për shkak të hezitimit të Italisë për t’iu bashkuar përpjekjeve të SHBA-së kundër Iranit.
Burimi: AA
