Panamaja është shpallur për të tretin vit radhazi vendi më i mirë në botë për emigrantët, sipas raportit Expat Insider 2026, të publikuar nga organizata ndërkombëtare InterNations.
Anketa përfshiu afro 8 mijë emigrantë nga 162 kombësi, të cilët vlerësuan jetën në vendin ku janë zhvendosur, bazuar në pesë tregues kryesorë: punësimi, financat personale, cilësia e jetës, lehtësia e procedurave administrative dhe përshtatja me komunitetin vendas.
Panamaja kryeson renditjen falë lehtësisë për t’u integruar, procedurave të thjeshta për vizat dhe burokracinë, si edhe mikpritjes së banorëve vendas. Rreth 87% e emigrantëve deklaruan se janë të kënaqur me jetën atje, ndërsa një në tre thotë se dëshiron të qëndrojë përgjithmonë.
Në vendin e dytë renditet Meksika, e cila mori vlerësimet më të larta për lehtësinë e krijimit të miqësive dhe ndjesinë e mirëseardhjes që përjetojnë të huajt.
Tajlanda zë vendin e tretë, me 86% të emigrantëve që shprehen të lumtur me jetën e tyre. Ajo vlerësohet veçanërisht për koston e ulët të jetesës dhe banesat e përballueshme.
Evropa
Nga vendet evropiane, vetëm tre shtete arritën të futen në dhjetëshen më të mirë.
Spanja renditet në vendin e gjashtë dhe është destinacioni më i vlerësuar në Evropë, falë klimës, cilësisë së jetës, transportit publik të përballueshëm dhe mundësive të shumta për udhëtime.
Portugalia është e teta, duke marrë nota të larta për financat personale dhe lehtësinë e integrimit të emigrantëve.
Ndërsa Luksemburgu mbyll dhjetëshen e parë, i vlerësuar veçanërisht për pagat e larta dhe sigurinë në punë.
Vendet më pak të preferuara
Në fund të renditjes gjenden Britania e Madhe, Turqia, Gjermania dhe Norvegjia, e cila renditet e fundit.
Norvegjia mori vlerësime të dobëta për vështirësinë e integrimit, cilësinë e jetës për emigrantët dhe kostot financiare.
Edhe Gjermania u kritikua për burokracinë, mungesën e shërbimeve digjitale, vështirësinë për të gjetur banesa dhe pengesat gjuhësore.
10 shtetet më të mira për emigrantët në vitin 2026
- Panamaja
- Meksika
- Tajlanda
- Emiratet e Bashkuara Arabe
- Brazili
- Spanja
- Singapori
- Portugalia
- Malajzia
- Luksemburgu
Burimi: Euronews
