Mungesa e banesave të përballueshme po i detyron gjithnjë e më shumë distriktet shkollore në Shtetet e Bashkuara të ndërmarrin një zgjidhje të pazakontë: ndërtimin e apartamenteve për mësuesit dhe punonjësit e arsimit.
Në shtete si Kalifornia, Teksasi dhe Florida, autoritetet arsimore po bashkëpunojnë me kompani ndërtimi për të shndërruar toka dhe godina të papërdorura të shkollave në komplekse banimi me qira të subvencionuar. Qëllimi është të ndihmohen mësuesit të jetojnë pranë vendit të punës, në një kohë kur çmimet e banesave janë rritur ndjeshëm.
Një nga shembujt më domethënës vjen nga San Diego, ku mësuesja Carolina Sanchez Garcia dikur udhëtonte deri në katër orë çdo ditë nga Tijuana e Meksikës për të shkuar në punë. Në vitin 2023 ajo fitoi me short të drejtën për të jetuar në një apartament të subvencionuar me tre dhoma gjumi në kompleksin “LIVIA Scripps Ranch”, i ndërtuar në truallin e një ish-shkolle. Sot ajo paguan rreth 1.500 dollarë në muaj për një apartament që në treg do të kushtonte rreth 4.500 dollarë dhe e ka shkollёn vetëm 15 minuta larg.
Distrikti shkollor i San Diegos ka njoftuar se do të ndërtojë rreth 2.500 apartamente për mësuesit, projekti më i madh i këtij lloji në SHBA. Banesat do të ndërtohen në gjashtë prona të ish-godinave administrative dhe pritet të jenë gati për banorët e parë në vitin 2030.
Sipas drejtuesve të arsimit, strehimi i përballueshëm është bërë një mjet i rëndësishëm për të tërhequr dhe mbajtur mësuesit në zonat ku kostoja e jetesës është shumë e lartë. Në San Diego, edhe pas rritjes së pagave dhe shtesave financiare, shkollat vazhdonin të kishin mungesë personeli, veçanërisht në arsimin special. Përfaqësuesit e sindikatës së mësuesve thonë se një banesë me qira të ulët ka pothuajse të njëjtin efekt si një rritje page.
Modele të ngjashme po zbatohen edhe në Austin të Teksasit dhe në disa distrikte të Floridës, ku toka publike e shkollave po përdoret për ndërtimin e banesave për punonjësit e arsimit. Megjithatë, projektet përballen edhe me sfida, si financimi, rregullimi i kuadrit ligjor dhe kundërshtimet e banorëve të zonave përreth.
Burimi: NYT
