Një gjykatë në Londër ka shpallur fajtor 19-vjeçarin norvegjez Johannes Kongsnes Natland, i akuzuar se udhëtoi drejt Mbretërisë së Bashkuar për të kryer një vrasje me pagesë të porositur nga Foxtrot Network, një organizatë kriminale suedeze që autoritetet e lidhin me Iranin.
Sipas prokurorisë, Natland kishte pranuar të vriste një person ende të paidentifikuar në këmbim të 25 mijë eurove. Ai mbërriti në Angli në mars të vitit të kaluar, por vetëm dy ditë më vonë u arrestua nga policia e armatosur në një hotel në Huddersfield, ku iu sekuestruan një pistoletë gjysmëautomatike, një revolver dhe 19 fishekë.
Vendimi u dha pas një rigjykimi dhe mbi 17 orësh diskutime të jurisë.
Gjatë procesit gjyqësor, Natland pretendoi se fillimisht kishte menduar se oferta për vrasje ishte një “shaka” ose mashtrim dhe se më pas kishte planifikuar të qëllonte veten në këmbë për të shmangur ekzekutimin e atentatit. Megjithatë, prokuroria paraqiti mesazhe që ai u kishte dërguar të afërmve, ku shkruante: “Po nisem në një mision të çmendur. Do të jetë interesante të vras dikë. Nëse nuk kapem, do të festojmë.”
Policia britanike tha se hetimet zbuluan prova të shumta që tregonin se i riu ishte plotësisht i vetëdijshëm se ishte dërguar në Britani për të vrarë një person.
Sipas hetimeve, Natland ishte rekrutuar nga rrjeti kriminal Foxtrot, një nga organizatat më të fuqishme kriminale në Suedi, e njohur për përfshirjen në vrasje, të shtëna me armë dhe trafik droge. Autoritetet suedeze besojnë se drejtuesi i grupit, Rawa Majid, i njohur si “Dhelpra Kurde”, fshihet aktualisht në Iran.
Prokuroria britanike e cilësoi Natland si “një të ri problematik, por të rrezikshëm”, duke theksuar se ai kishte pranuar të vriste një njeri në një vend të huaj vetëm për para.
Hetimet zbuluan se 19-vjeçari ishte nisur nga Stavangeri i Norvegjisë drejt aeroportit të Mançesterit me një pasaportë të përkohshme. Edhe pse fillimisht u ndalua nga autoritetet kufitare dhe iu kërkua të kthehej në Norvegji, ai mori një taksi drejt Huddersfieldit, ku mori 2 mijë paund, armët, municionin dhe një makinë të vjedhur me targa false. Ai u arrestua mëngjesin e ditës pasuese, përpara se të mund të kryente atentatin.
Sipas hetuesve, gjatë gjithë kohës ai drejtohej nga një person me pseudonimin “Agjenti 47”, identiteti dhe vendndodhja e të cilit mbeten ende të panjohura.
