Irani pretendon se ka goditur me raketa balistike bazën ajrore Al-Azraq në lindje të Jordanisë, duke shkatërruar tre avionë luftarakë amerikanë F-35 dhe duke dëmtuar rëndë edhe tre të tjerë. Pretendimi u bë nga Garda Revolucionare Islamike (IRGC), por deri tani nuk është konfirmuar nga Shtetet e Bashkuara apo Jordania.
Sipas deklaratës së IRGC-së, sulmi kishte në shënjestër zonën ku ishin vendosur dhe mirëmbaheshin avionët amerikanë F-35 dhe ishte një kundërpërgjigje ndaj sulmeve amerikane mbi dy banesa në ishullin iranian Qeshm.
Autoritetet iraniane pretendojnë gjithashtu se nga sulmi janë vrarë disa oficerë, si edhe personel teknik dhe mirëmbajtës.
Ndërkohë, ushtria jordaneze deklaroi se ka interceptuar dhe rrëzuar pesë raketa të lëshuara nga Irani drejt territorit të saj, duke theksuar se ishte dita e katërt radhazi me incidente të tilla. Një ditë më parë, Jordania njoftoi se kishte rrëzuar pesë raketa, ndërsa të hënën dhe të martën kishte neutralizuar edhe disa dronë iranianë.
Ngjarja vjen pasi Komanda Qendrore e SHBA-së (CENTCOM) njoftoi se forcat amerikane goditën objektiva në Iran si kundërpërgjigje ndaj asaj që i cilësoi tentativa iraniane për të sulmuar forcat amerikane në Lindjen e Mesme.
Burimi: AA
