Agjencia Qendrore e Inteligjencës e SHBA-së (CIA) ka krijuar në mënyrë të fshehtë një njësi të posaçme për Kubën, me synimin për të intensifikuar presionin ndaj qeverisë në Havanë dhe për të zgjeruar operacionet e inteligjencës kundër ishullit, raportoi The New York Times.
Sipas gazetës amerikane, duke cituar burime të njohura me nismën, struktura e re do t’i lejojë CIA-s të përqendrojë më shpejt burime financiare, njerëzore dhe teknologjike në operacionet që lidhen me Kubën, në kuadër të politikës së presidentit Donald Trump për të nxitur ndryshime ekonomike, politike dhe në drejtimin e vendit.
Raporti bën të ditur se njësia ka nisur të shtojë në përbërje oficerë të terrenit, analistë të inteligjencës, specialistë të sigurisë kibernetike dhe ekspertë të operacioneve të fshehta të ndikimit.
Sipas burimeve të The New York Times, një nga objektivat kryesore të kësaj strukture është krijimi i përçarjeve brenda elitës politike kubane, me synimin për të favorizuar zëvendësimin e zyrtarëve që konsiderohen kundër interesave amerikane me drejtues më të hapur ndaj kërkesave të administratës Trump.
CIA nuk ka pranuar të komentojë raportin. Nëse konfirmohet, krijimi i kësaj njësie sinjalizon një përshkallëzim të strategjisë amerikane ndaj Kubës dhe një rikthim të operacioneve të fshehta si pjesë e politikës së Uashingtonit ndaj ishullit.
