Greqia ka regjistruar një rënie të fortë të aplikimeve për programin “Golden Visa” gjatë vitit 2026, pasi rritja e pragut minimal të investimit dhe kufizimet e reja për pronat kanë ndryshuar ndjeshëm interesin e investitorëve të huaj.
Në gjashtë muajt e parë të vitit u paraqitën 2.551 aplikime të reja për leje qëndrimi për investitorë, kundrejt 4.553 në të njëjtën periudhë të vitit 2025, një rënie prej 44%. Deri në fund të korrikut, numri i aplikimeve për leje fillestare kishte arritur në 3.086.
Megjithatë, ndërsa aplikimet e reja po bien, numri i lejeve të miratuara është rritur, kryesisht për shkak të përpunimit të dosjeve të mbartura nga vitet e mëparshme. Në gjysmën e parë të 2026-s u dhanë 4.919 leje të reja, 21% më shumë se një vit më parë.
Në fund të korrikut, në Greqi rezultonin aktive 34.278 leje “Golden Visa”, prej të cilave 26.310 ishin leje fillestare dhe 7.968 rinovime ose leje të rilëshuara. Ndërkohë, 7.850 aplikime vazhdonin të prisnin shqyrtimin, shumica e tyre në Atikë.
Rënia e interesit lidhet drejtpërdrejt me kushtet e reja të programit. Në zonat me kërkesë të lartë, përfshirë Atikën dhe Selanikun, si dhe ishujt grekë me më shumë se 3.150 banorë të përhershëm, investimi minimal në pronë ka arritur në 800.000 euro. Në pjesën tjetër të vendit pragu është 400.000 euro.
Mundësia për të marrë “Golden Visa” me një investim prej 250.000 eurosh vazhdon të ekzistojë vetëm për kategori të caktuara pronash, ndër të tjera për ndërtesa që ndryshojnë destinacion dhe shndërrohen nga ambiente tregtare, zyra, ish-objekte industriale apo struktura të tjera në banesa.
Një tjetër ndryshim i rëndësishëm prek mënyrën e shfrytëzimit të pronës. Sipas rregullave të reja, pronat e blera në kuadër të skemës nuk mund të përdoren për qira afatshkurtra turistike, duke hequr një prej burimeve të të ardhurave që e kishte bërë programin veçanërisht tërheqës për investitorët.
Masat lidhen edhe me shqetësimet për rritjen e çmimeve të banesave dhe vështirësitë e grekëve për të gjetur shtëpi me qira të përballueshme. Qeveria synon që një pjesë më e madhe e stokut të banesave të rikthehet në tregun e qirave afatgjata.
Në këtë drejtim po shqyrtohet edhe krijimi i një kategorie të re lejeje qëndrimi për investitorët që blejnë disa prona njëherësh, me kusht që ato të jepen vetëm me qira afatgjatë. Investitorët nuk do të lejoheshin as t’i përdornin vetë dhe as t’i shfrytëzonin për qira turistike, por propozimi është ende në fazë diskutimi dhe nuk është miratuar përfundimisht.
