Një ekip arkeologësh spanjollë dhe egjiptianë ka zbuluar në nekropolin e Saqqara-s një varr rreth 4,400-vjeçar, i cili ka mahnitur studiuesit për gjendjen e jashtëzakonshme të ruajtjes. Reliefet që zbukurojnë muret vazhdojnë të mbajnë, pas mijëra vjetësh, ngjyrat e tyre origjinale.
Zbulimi daton në fundin e Dinastisë së Pestë të Mbretërisë së Vjetër të Egjiptit, gjatë sundimit të faraonit Djedkare Isesi, rreth viteve 2494–2345 para Krishtit.
Varri është një mastaba me dy kapela funerare, e ndërtuar për Yunmen, një zyrtar i lartë i administratës së faraonit. Brenda saj u varros edhe babai i tij, Iti, i cili kishte mbajtur një post më të ulët. Arkeologët mendojnë se monumenti mund të dëshmojë edhe ngritjen shoqërore të Yunmenit, i cili kishte arritur nga një familje provinciale në nivelet e larta të administratës qendrore.
Ajo që e bën zbulimin veçanërisht të çmuar janë dekorimet. Në muret e varrit shfaqen skena të jetës bujqësore, procesione me oferta, kafshë, përfshirë gomarë, si dhe mbishkrime funerare të lidhura me jetën dhe funksionet e të ndjerëve. Një pjesë e konsiderueshme e këtyre relieveve ka ruajtur pigmentet origjinale.
Sipas autoriteteve egjiptiane, varri ofron të dhëna të reja për artin, arkitekturën, jetën administrative dhe organizimin e shoqërisë egjiptiane në fund të Dinastisë së Pestë.
Zbulimi u bë gjatë gërmimeve të kësaj vere nga misioni i drejtuar nga egjiptologu spanjoll Josep Cervelló, në bashkëpunim mes Universitetit Autonom të Barcelonës dhe Këshillit Suprem të Antikiteteve të Egjiptit.
Zona ku u gjet varri njihet që prej kërkimeve të arkeologut francez Auguste Mariette në shekullin XIX, por nuk ishte studiuar në mënyrë të plotë. Madje, kërkimet e fundit kanë dhënë shenja për dy mastaba të tjera të panjohura, të cilat arkeologët shpresojnë t’i hapin gjatë ekspeditave të ardhshme.
Burimi: Euronews
