Gjashtë shtetas nigerianë, të akuzuar se kanë mashtruar më shumë se 100 gra amerikane përmes lidhjeve romantike të krijuara në internet, janë ekstraduar nga Afrika e Jugut drejt Shteteve të Bashkuara.
Sipas autoriteteve, viktimave u janë marrë në total më shumë se 6 milionë dollarë, ndërsa mes tyre kishte pensioniste dhe gra të angazhuara në biznes.
Gjashtë të dyshuarit, të arrestuar në Cape Town që në vitin 2021, akuzohen për mashtrim elektronik dhe pastrim parash. Ata dyshohet se janë të lidhur me rrjetin kriminal “Black Axe”, të cilin Interpol e konsideron një prej grupeve të përfshira gjerësisht në mashtrimet financiare të mundësuara nga teknologjia.
Skema bazohej në krijimin e marrëdhënieve të rreme sentimentale në internet. Të dyshuarit fitonin gradualisht besimin e grave dhe më pas i bindnin ato të dërgonin para, duke shfrytëzuar lidhjen emocionale të krijuar online.
Të premten, gjashtë burrat u transportuan nga një institucion penitenciar në Cape Town drejt aeroportit ndërkombëtar të qytetit, ku iu dorëzuan përfaqësuesve të FBI-së dhe Shërbimit Sekret amerikan. Operacioni u koordinua nga autoritetet e Afrikës së Jugut në bashkëpunim me Interpolin.
Rasti është pjesë e një goditjeje më të gjerë ndaj rrjeteve kriminale të Afrikës Perëndimore që përdorin internetin për mashtrime romantike, investime të rreme dhe skema me kriptomonedha.
Vetëm në një operacion tjetër në Afrikën e Jugut, autoritetet arrestuan 39 persona, sekuestruan rreth 2.67 milionë dollarë dhe ngrinë mbi 250 llogari bankare të lidhura me skema të ngjashme.
Gjashtë të ekstraduarit tashmë do të përballen me drejtësinë amerikane për akuzat e mashtrimit elektronik dhe pastrimit të parave.
