Autoritetet spanjolle dhe franceze kanë sekuestruar 2.1 tonë kokainë në një jaht në Atlantik dhe kanë arrestuar pesë persona, mes tyre edhe një shqiptar, i cili dyshohet se kishte detyrën të mbikëqyrte dorëzimin e drogës te blerësit në Ballkan.
Operacioni i koduar “Doncella” u zhvillua nga Shërbimi i Mbikëqyrjes Doganore të Spanjës në bashkëpunim me autoritetet doganore franceze. Jahti u kap rreth 400 milje larg brigjeve të Galicisë, ndërsa në bord u gjetën 70 pako të mëdha me gjithsej 2,100 kilogramë kokainë.
Hetimi kishte nisur që në shkurt në Girona, pas dyshimeve për një jaht 14 metra të gjatë me flamur polak. Sipas hetuesve, rrjeti siguronte mjete lundruese me flamuj të huaj për grupe të krimit të organizuar nga Europa Lindore dhe Ballkani.
Jahti u lokalizua në Roses të Gironës dhe u mbajt nën vëzhgim deri më 11 korrik, kur doli në det duke fikur sistemin e gjurmimit. Në operacion u përfshinë më pas edhe DEA amerikane, Agjencia britanike e krimit dhe Qendra e Analizës dhe Operacioneve Detare kundër Narkotikëve në Portugali.
Në orët e para të 14 shtatorit, forcat spanjolle hipën në jaht dhe zbuluan ngarkesën e kokainës. Katër anëtarët e ekuipazhit, me shtetësi argjentinase, uruguaiane, kolumbiane dhe shqiptare, u arrestuan në det. Sipas hetimit, shqiptari dyshohet se ishte personi që mbikëqyrte dorëzimin e ngarkesës te blerësit në Ballkan.
Ndërkohë, në Girona u arrestua edhe drejtuesi i dyshuar i rrjetit, një shtetas kilian që merrej me sigurimin e mjeteve lundruese. Hetimet vazhdojnë edhe për një person tjetër në Barcelonë, i cili dyshohet se kujdesej për mbikëqyrjen dhe logjistikën e grupit.
Të arrestuarit pritet të dalin përpara Gjykatës Kombëtare të Spanjës nën akuzat për pjesëmarrje në grup të organizuar kriminal, kontrabandë dhe trafik droge.
