Ministria e Drejtësisë në Çeki ka nisur hetimet për një rrjedhje të mundshme të të dhënave personale që mund të ketë prekur afro 2 milionë njerëz, pasi një version testues i regjistrit të ri tregtar bëri gabimisht të aksesueshme për publikun informacione sensitive.
Problemi u zbulua në sistemin e ri që po testohej nga ministria, ku për shkak të një gabimi u ekspozuan edhe numrat personalë të identifikimit, të dhëna unike për çdo qytetar, të krahasueshme me numrat e sigurimeve shoqërore në Shtetet e Bashkuara.
Një tjetër gabim në programim kishte bërë të mundur edhe aksesin në dokumente që nuk duhej të ishin publike.
Pasi u njoftua për problemin, Ministria e Drejtësisë e nxori menjëherë jashtë funksionit sistemin testues dhe informoi autoritetet çeke përgjegjëse për sigurinë kibernetike dhe mbrojtjen e të dhënave personale.
Ende nuk është përcaktuar përmasa përfundimtare e incidentit dhe po hetohet nëse dhe sa të dhëna janë aksesuar realisht. Megjithatë, vlerësimet paraprake tregojnë se informacionet personale të gati 2 milionë personave mund të jenë ekspozuar.
