Modeli i Inteligjencës Artificiale Gemini i Google arriti të hynte në sistemet kompjuterike të tre kompanive gjatë testeve të sigurisë kibernetike, duke përdorur internetin dhe kredenciale hyrjeje për të depërtuar në sisteme që në fakt nuk ishin pjesë e mjedisit të kontrolluar të testimit. Është rasti i parë i njohur kur një sistem i Google shfaq një sjellje të tillë në mënyrë autonome.
Incidentet ndodhën në muajin maj dhe u zbuluan nga Google në korrik, por kompania i bëri publike vetëm pasi u pyet për to nga The Wall Street Journal. Gemini po testohej pikërisht për aftësitë e tij në fushën e sigurisë kibernetike, kur arriti të depërtonte në sisteme të kompanive të tjera.
Në një nga tre rastet, Inteligjenca Artificiale hamendësoi fjalëkalimin e nevojshëm për të hyrë në një sistem të mbrojtur, ndërsa në dy rastet e tjera gjeti kredenciale hyrjeje në një bazë të dhënash. Emrat e tre kompanive të prekura nuk janë bërë publikë.
Google shpjegoi se Gemini kishte gjetur informacione publike në internet dhe më pas kishte përdorur kredencialet për të hyrë në faqe që modeli besonte se ishin pjesë e testit. Sipas kompanisë, në të tre rastet Gemini u ndal vetë dhe nuk vazhdoi më tej, ndërsa kompanitë e prekura u njoftuan dhe procedurat e testimit u ndryshuan.
Rasti shton shqetësimet për atë që mund të ndodhë ndërsa modelet e Inteligjencës Artificiale po shndërrohen gjithnjë e më shumë në agjentë autonomë, të aftë jo vetëm të japin përgjigje, por edhe të përdorin internetin, të kryejnë veprime dhe të ndërveprojnë drejtpërdrejt me sisteme kompjuterike.
