Ergys Agasi nuk ishte ministër, nuk ishte drejtor policie, nuk drejtonte SHISH-in dhe nuk kishte ndonjë funksion kushtetues. Por sa më shumë hapet dosja e SPAK, aq më shumë shpalosen faktet që tregojnë atë që përflitej nëpër Shqipëri: Gysi shtetin e kishte në telefon.
Materialet e publikuara sot nga dosja e SPAK janë ndoshta fotografia më e fortë e këtij pushteti informal. Në vetëm dy muaj, nga 28 qershori deri më 26 gusht, hetuesit kanë gjetur 508 forma komunikimi mes Agasit dhe drejtueses së atëhershme të SHISH, Vlora Hyseni: mesazhe, telefonata, videocall, fotografi dhe video. SPAK, sipas pjesëve të dosjes të publikuara nga mediat, nuk e pranon versionin e Hysenit se Agasi ishte thjesht një “bashkëpunëtor” i shërbimit.
Drejtuesja e shërbimit sekret e informonte Agasin se kur do të takohej me kryeministrin, për takime me partnerë të huaj dhe për kontakte me drejtues të Policisë. Ndërkohë, në makinën e Agasit në Equos Resort, SPAK thotë se u gjetën nëntë printime me diagrame që dyshohen si materiale të prodhuara nga SHISH. Agasi, sipas dosjes së publikuar, ka deklaruar madje se sendet i kishte lënë që t’i gjente Prokuroria.
Materiale të një shërbimi sekret në makinën e një privati, të mbajtura me një normalitet sikur makina të ishte kasafortë shtetërore.
Sali Berisha e ka quajtur prej kohësh Agasin “koordinator të krimit” dhe ka pretenduar publikisht se ndikimi i tij arrinte deri te Policia dhe SHISH. Ishin akuza politike të Berishës, jo fakte të provuara atëherë. Por dosja e sotme sjell tashmë një fakt hetimor shumë më konkret: kreu i SHISH komunikonte intensivisht me Agasin edhe kur ai ishte në kërkim dhe, sipas SPAK, marrëdhënia e tyre nuk përputhet me shpjegimin e një bashkëpunimi normal institucional.
Njeriu që, sipas dosjes, kishte qindra komunikime me kreun e SHISH, që kishte materiale të shërbimit sekret në makinë dhe që prej vitesh akuzohej politikisht se kishte hyrje në majat e pushtetit, mund të jetë njëkohësisht edhe njeriu që di më shumë për mënyrën se si funksiononte kjo piramidë.
Nëse Gysi fillon të flasë, deri ku shkon historia?
Arroganca e pushtetit informal ka një problem të vjetër: kur beson se je i paprekshëm, nuk fshin më gjurmët. I ruan në telefon, i regjistron në zyrë dhe dokumentet i lë në makinë.
Ndoshta jo rastësisht, Berisha e ka quajtur Ergys Agasin “pentito”, duke lënë të kuptohet se Gysi mund të jetë njeriu që, kur të vijë momenti, do të tregojë çfarë di. Berisha mund ta njohë më mirë se shumë të tjerë personazhin: Agasi është kushëri i dhëndrit të tij. Nëse ishte thjesht një thumb politik apo Berisha di diçka më shumë, këtë do ta tregojë koha. Por pas asaj që po del nga dosja, një gjë është e sigurt: nëse ka një njeri që mund të tregojë se deri ku shtriheshin fijet e kësaj historie, ai është pikërisht Gysi. Dhe ndoshta “koordinatori” mund të përfundojë duke u bërë dëshmitari i koordinimit.
