Legjenda britanike e muzikës Rod Stewart ka njoftuar se turneu i tij në Mbretërinë e Bashkuar dhe Europë në vitin 2027 do të jetë i fundit, duke mbyllur një epokë prej më shumë se gjashtë dekadash koncertesh dhe udhëtimesh nëpër botë.
Këngëtari 81-vjeçar do ta nisë turneun “The Final Encore” më 23 prill në Dublin, për të vijuar më pas në Belfast, Glasgow, Birmingham, Manchester dhe Londër. Pas koncerteve të tjera në Europë, turneu do të përfundojë më 24 korrik në ZAG Arena në Hanover të Gjermanisë.
“Miqtë e mi të dashur, ka ardhur koha t’i them lamtumirë jetës në rrugë”, deklaroi Stewart, duke falënderuar publikun që e ka shoqëruar gjatë gjithë karrierës dhe duke premtuar “një spektakël të jashtëzakonshëm” për turneun e fundit.
Megjithatë, Rod Stewart nuk po tërhiqet nga muzika. Ai ka lënë të hapur mundësinë për koncerte të veçanta dhe dalje të tjera në skenë pas përfundimit të turneut të madh. Dy koncerte në Red Rocks Amphitheatre në Kolorado janë planifikuar tashmë për shtatorin e vitit 2027, pasi ishin shtyrë nga qershori i këtij viti për shkak të një inflamacioni që i kishte prekur kordat vokale.
Njoftimi vjen pas një periudhe të vështirë për aktivitetin e tij koncertor. Në gusht, Stewart anuloi datat e mbetura të turneut amerikan “One Last Time”, pasi iu nënshtrua një ndërhyrjeje rutinë për vendosjen e një stenti koronar. Përfaqësuesit e tij deklaruan se procedura përfundoi me sukses dhe rikuperimi po ecte mirë.
Stewart nisi të performonte që në adoleshencë dhe në fillim të viteve 1960 udhëtonte nëpër Europë me muzikantin folk Wizz Jones. Më pas u bë pjesë e disa grupeve, përpara se të fitonte famë më të gjerë me Jeff Beck Group dhe Faces.
Karriera e tij solo mori hov në vitin 1971 me albumin Every Picture Tells a Story, ku përfshihej hiti “Maggie May”. Në dekadat që pasuan, ai publikoi këngë që u kthyen në klasike, mes tyre “Sailing”, “Tonight’s the Night” dhe “Da Ya Think I’m Sexy?”.
Gjatë karrierës, Rod Stewart ka arritur 11 albume në vendin e parë në klasifikimet britanike, ndërsa suksesi i tij më i fundit në krye të renditjes erdhi në vitin 2024 me Swing Fever, bashkëpunimin me pianist-in dhe drejtuesin e orkestrës Jools Holland.
Biletat për turneun “The Final Encore” dalin në shitje të përgjithshme më 2 tetor, ndërsa parashitja për fansat nis më 29 shtator.
