Ambasadori i SHBA-sё në Izrael, Mike Huckabee, i ka pohuar podkasterit Tucker Carlson se Izraeli ka të drejtë biblike për të marrë përsipër të gjithë Lindjen e Mesme – ose të paktën një pjesë të madhe të saj. “Do të ishte mirë nëse do t’i merrnin të gjitha”, tha Huckabee Carlson gjatë një interviste të postuar të premten.
I emëruari i administratës Trump dhe ish-guvernatori i Arkansasit diskutoi me Carlson interpretimet e shkrimeve të shenjta të Dhiatës së Vjetër brenda lëvizjes nacionaliste të krishterë në SHBA. Carlson pyeti Huckabee-n rreth një vargu biblik në të cilin Zoti i premton Abrahamit se pasardhësit e tij do të marrin tokë “nga përroi i Egjiptit deri në lumin e madh, Eufratin – vendi i Kenejve, Kenizejve, Kadmonejve, Hitejve, Perezejve, Refajve, Amorejve, Kananejve, Girgashejve dhe Jebusejve”.
Carlson theksoi se kjo zonë, në gjeografinë moderne, do të përfshinte “në thelb të gjithë Lindjen e Mesme”.
“Levanti… Izraeli, Jordania, Siria, Libani – do të ishin gjithashtu pjesë të mëdha të Arabisë Saudite dhe Irakut”, tha ai.
Huckabee u përgjigj: “Nuk jam i sigurt nëse do të shkonte kaq larg, por do të ishte një copë e madhe toke.” Ai shtoi: “Izraeli është një tokë që Perëndia ia dha, nëpërmjet Abrahamit, një populli që ai zgjodhi. Ishte një popull, një vend dhe një qëllim.” I pyetur drejtpërdrejt nëse Izraeli ka të drejtë mbi atë territor, Huckabee tha: “Do të ishte mirë nëse do ta merrnin të gjithën.”
Intervista u zhvillua në Izrael gjatë një udhëtimi që shkaktoi bujë në media, pasi Carlson pretendoi se kishte përjetuar një trajtim “të çuditshëm” në aeroportin Ben Gurion. Zyrtarët izraelitë dhe amerikanë, megjithatë, deklaruan se ai iu nënshtrua kontrolleve rutinë të sigurisë.
Carlson e ka vënë gjithnjë e më shumë në pikëpyetje mbështetjen e SHBA-së për Izraelin, duke u distancuar nga linja tradicionale e lëvizjes “Ta bëjmë Amerikën të madhe përsëri”. Në të kundërt, Huckabee përfaqëson një qëndrim konservator tradicionalisht pro-Izraelit.
Pas transmetimit të pretendimeve të Carlson për trajtim të pazakontë në Tel Aviv, ish-kryeministri izraelit Naftali Bennett reagoi ashpër, duke e quajtur ish-prezantuesin e Fox News “idiot”. “Herën tjetër që ai flet për Izraelin sikur të ishte ekspert, mos harroni se ky djalë është i gёnjeshtёrt!”, shkroi Bennett në rrjetin X.
Edhe Huckabee reagoi në X, duke theksuar: “Kushdo qё hyn ose del nga Izraeli – si nga çdo vend tjetër – kontrollon pasaportën dhe i bëhen rregullisht pyetje sigurie.” Autoriteti i Aeroporteve të Izraelit deklaroi gjithashtu se “Tucker Carlson dhe shoqëruesit e tij nuk u ndaluan, nuk u vonuan dhe as nuk u morën në pyetje.”
(Burimi: The Guardian)
