Sulmi amerikan dhe izraelit mbi Iranin filloi në orët e para të mëngjesit të kësaj të shtune.
Presidenti Trump, në një dalje publike, deklaroi nisjen e operacionit ushtarak “në shkallë të gjerë” kundër objektivave ushtarake në Iran. Synimi, sipas tij, është ndryshimi i regjimit të Ajatollahëve.
Nga ana tjetër, Irani u përgjigj me një deklaratë të Ministrit të Jashtëm, duke kërcënuar se lufta nuk do të ketë limite dhe nuk do të kursejë asnjë nga vendet që bashkëpunojnë me aleancën SHBA-Izrael.
Kjo u pa menjëherë në terren. Pas valës së parë të sulmeve amerikane mbi ndërtesa qeveritare dhe objektiva ushtarake në të gjithë territorin iranian, me qindra raketa u lëshuan nga bazat iraniane në drejtim të Katarit, Bahreinit, Emirateve të Bashkuara Arabe, Arabisë Saudite, pa kursyer natyrisht Izraelin, i cili ka shpallur gjendjen e jashtëzakonshme pa afat.
Sulmet duket se po ndezin rajonin e Lindjes së Mesme në një luftë me përmasa të paparashikuara.
Në Abu Dhabi dhe Dubai, që kanë qenë tradicionalisht destinacione turistike, janë dëgjuar shpërthime të fuqishme.
Në Irak raportohet për sulme nga Irani drejt bazave amerikane.
Jordania ka shpallur gjendjen e emergjencës ushtarake dhe ka ngritur flotën ajrore për patrullimin e qiellit të saj.
Nga mediat izraelite raportohet se në sulmin e parë ndaj Iranit janë targetuar udhëheqësit më të lartë ushtarakë të vendit. Nuk konfirmohet vrasja e tyre, por reagimi i koordinuar ushtarak tregon se ushtria iraniane funksionon normalisht dhe nuk u kap “në gjumë”.
Edhe pse ishte një sulm i paralajmëruar, bota po sheh live flakët e një lufte rajonale në Lindjen e Mesme.
A është ky një prelud i Luftës së III Botërore?
