Donald Trump ka sugjeruar se Shtetet e Bashkuara mund të kryejnë një “pushtim miqësor” të Kubës, në një moment kur marrëdhëniet mes Uashingtonit dhe Havanës ndodhen në një nga pikat më të ulëta të dekadave të fundit, pas kapjes së presidentit venezuelian Nicolás Maduro.
Teksa largohej nga Shtëpia e Bardhë për një aktivitet fushate në Teksas, Trump deklaroi: “Qeveria kubaneze po flet me ne. Ata janë në telashe të mëdha.” Ai nuk dha detaje të mëtejshme, por mediat kanë raportuar se zyrtarë amerikanë janë takuar me Raúl Guillermo Rodríguez Castro, nipin e ish-udhëheqësit Raúl Castro, në prag tё samitit të Caricom, si pjesë e negociatave për hapjen e ishullit.
“Ata nuk kanë para, nuk kanë asgjë tani për tani. Por po flasin me ne dhe ndoshta do të kemi një pushtim miqësor të Kubës,” shtoi Trump.
Komentet e tij vijnë në një kohë kur SHBA-të kanë shtuar ndjeshëm presionin ndaj regjimit kubanez, sidomos pas operacionit që çoi në rrëmbimin e Nicolás Maduros në janar. Sipas raportimeve, përpara ndërhyrjes në Karakas, zyrtarët amerikanë morën një premtim bashkëpunimi nga Delcy Rodríguez, zëvendësja e Maduros dhe aktualisht presidente në detyrë e Venezuelës, e cila është zotuar të hapë rezervat e mëdha të naftës për kompanitë e huaja.
Presioni amerikan çoi gjithashtu në largimin e prokurorit të përgjithshëm Tarek William Saab dhe në ndërprerjen e eksporteve të naftës nga Venezuela drejt Kubës. SHBA-të kanë vendosur një bllokadë nafte ndaj ishullit, duke rënduar më tej krizën ekonomike.
“Kam dëgjuar për Kubën që kur isha i vogël, por ata janë në telashe të mëdha,” tha Trump, duke sugjeruar se një ndryshim në ishull mund të ishte “diçka e mirë… shumë pozitive” për komunitetin e madh të kubanezëve në SHBA. “Kemi njerëz që jetojnë këtu që duan të kthehen në Kubë dhe janë shumë të lumtur me atë që po ndodh,” shtoi ai.
Gjuha e përdorur nga Trump ka ngjallur shqetësime në Kubë, duke risjellë në kujtesë periudhën para revolucionit të vitit 1959, kur dominimi ekonomik amerikan ishte një nga faktorët që çoi në ardhjen në pushtet të Fidel Castros.
Presidenti kubanez Miguel Díaz-Canel ka theksuar më herët se çdo dialog me SHBA-në duhet të zhvillohet “nga një pozicion i barabartë, me respekt për sovranitetin, pavarësinë dhe vetëvendosjen tonë”, dhe pa ndërhyrje në punët e brendshme.
Sipas Manuel Barcia, profesor historie në Universitetin e Bath, “momenti i Murit të Berlinit për Kubën është shumë afër”, duke sugjeruar se administrata amerikane, me rol të rëndësishëm të sekretarit të shtetit Marco Rubio, po orkestron një ndryshim të thellë në rajon.
Pedro Freyre, përfaqësues i komunitetit të mërgimtarëve kubanezë në SHBA, e interpreton gjuhën e Trump si sinjal për një marrëveshje ekonomike më shumë sesa politike. “Kjo është formuluar në terminologjinë e biznesit. Tregon për hapje ekonomike, jo domosdoshmërisht politike, nën kujdesin e SHBA-së,” tha ai.
Ndërkohë, analisti William LeoGrande nga Universiteti Amerikan në Uashington vlerëson se administrata po përpiqet të mbajë në krah komunitetin kubano-amerikan, duke theksuar rolin e të ngarkuarit me punë në Havana, Mike Hammer, i cili ka zhvilluar vizita në Miami dhe Madrid për të forcuar lidhjet me diasporën.
Deklaratat e Trump vijnë vetëm pak ditë pas një incidenti të armatosur në brigjet veriore të Kubës, ku një grup mërgimtarësh të armatosur nga Florida dyshohet se tentuan të zbarkonin me një motoskaf plot armë. Shkëmbimi i zjarrit në det la katër të vdekur dhe shtatë të plagosur.
Me tensionet që rriten dhe retorikën që ashpërsohet, marrëdhëniet SHBA–Kubë duket se po hyjnë në një fazë të re, me pasoja të paparashikueshme për rajonin.
(Burimi: The Guardian)
