Një burrë 64-vjeçar në Itali është dënuar me 11 vjet burg për vrasjen e të birit, pasi gjykata pranoi si rrethanё lehtësuese provokimin. Prokuroria kishte kërkuar një dënim prej 22 vitesh, por gjykata vendosi ta përgjysmojë atë, duke marrë parasysh situatën në të cilën ndodhi ngjarja.
Edoardo Borghini vrau të birin, Nicolò Borghini, 34 vjeç, më 19 janar 2025 në shtëpinë e familjes në Ornavasso, në provincën Verbano-Cusio-Ossola. Sipas hetimeve, ai qëlloi djalin nga frika për sigurinë e gruas së tij, pasi ky i fundit kishte sulmuar prindërit.
Ngjarja ndodhi një mbrëmje të dielë, kur 34-vjeçari u kthye në shtëpi i dehur pas një pasditeje të kaluar në tre bare. Analizat në trupin e tij treguan një nivel alkooli në gjak prej rreth 2.5 gramë për litër.
Sipas rindërtimit të ngjarjes, djali u zemërua pasi gjeti të mbyllur derën e garazhit dhe nisi të sulmonte prindërit. Ai e kapi nënën nga qafa, ia përplasi kokën në mur dhe i kafshoi krahun, ndërsa tentoi të sulmonte edhe babanë.
Në atë moment, babai mori pushkën që e mbante ligjërisht dhe qëlloi dy herë në korridorin e shtëpisë, nga një distancë shumë e afërt. 34-vjeçari vdiq menjëherë.
Pas ngjarjes, Borghini iu dorëzua karabinierëve.
“Ai ishte i çmendur, plotësisht i tërbuar. Mendova se duhej ta ndaloja”, tha 64-vjeçari në gjykatë gjatë seancave dëgjimore, duke shpjeguar se kishte vepruar instinktivisht për të mbrojtur gruan.
Gjatë gjyqit dolën në pah edhe episode të mëparshme dhune nga djali ndaj familjes, shoqёruar nga kërkesa të vazhdueshme për para nga prindërit.
Gruaja e të pandehurit, e cila kishte vendosur të mos paraqitej si palë civile në proces, kishte tentuar të zbuste agresivitetin e të birit gjatë dëshmisë së saj. Ajo u largua nga salla e gjyqit para shpalljes së vendimit, ku ishin të pranishëm rreth pesëmbëdhjetë të afërm.
Vendimi u dha nga Gjykata e Krimeve të Rënda në Novara, e kryesuar nga gjyqtari Gianfranco Pezone, së bashku me gjyqtarët Giovanni Celani dhe gjashtë gjyqtarë të tjerë të asociuar.
Gjykata urdhëroi gjithashtu konfiskimin e pushkës dhe fishekëve të Borghinit, si dhe shkatërrimin e rrobave të viktimës. Arsyetimi i plotë i vendimit pritet të publikohet brenda 15 ditësh.
Borghini do ta apelojë vendimin, por ndërkohë ai mbetet në arrest shtëpiak në banesën e një të afërmi, pasi kaloi katër ditë në burg menjëherë pas krimit.
“Jam i bindur se ka vend për ta ndryshuar këtë dënim për mirë”, tha avokati mbrojtës Gabriele Pipicelli. Ai shtoi se klienti i tij është përfshirë edhe në një proces të drejtësisë restauruese dhe se çështja do të shqyrtohet nga Gjykata e Apelit në Torino.
“Për Borghinin dënimi nuk është burgu, por fakti që vrau të birin e tij”, përfundoi avokati.
(Burimi: ANSA)
