Policia e Tiranës ka njoftuar se do të kufizojë qarkullimin e automjeteve në disa akse rrugore të kryeqytetit gjatë ditës së nesërme, për shkak të një tubimi të paralajmëruar nga Partia Demokratike para godinës së Parlamentit.
Sipas njoftimit zyrtar, përfaqësues të subjektit politik Partia Demokratike kanë informuar policinë për zhvillimin e një proteste ditën e nesërme në orën 10:00, përpara Kuvendit të Shqipërisë.
Në funksion të garantimit të rendit dhe sigurisë publike gjatë tubimit, Policia e Tiranës, me mbështetjen e Drejtorisë së Përgjithshme të Policisë së Shtetit, ka bërë të ditur se ka marrë një sërë masash në zbatim të ligjit “Për tubimet”.
Ndryshe nga dy protestat e fundit të organizuara nga opozita, këtë herë policia ka njoftuar se kufizimet në qarkullim do të nisin që në orën 06:00 të mëngjesit dhe do të vijojnë deri në përfundim të tubimit.
Sipas policisë, gjatë kësaj kohe do të bllokohet lëvizja e automjeteve në rrugën “George W. Bush”, segmenti që kalon pranë godinës së Parlamentit.
Autoritetet paralajmërojnë gjithashtu se, në varësi të zhvillimit të tubimit dhe numrit të pjesëmarrësve, mund të ketë kufizime të përkohshme të qarkullimit edhe në akse të tjera rrugore në zonën përreth.
Policia ka bërë të ditur se janë marrë masa për devijimin e trafikut në rrugë alternative, me qëllim lehtësimin e qarkullimit për qytetarët që do të lëvizin në këtë zonë gjatë orëve të protestës.
Njoftimin Policia e Tiranës e mbyll me apelin standard ndaj qytetarёve, që ata të distancohen në rast se përballen me veprime të kundërligjshme që mund të cenojnë rendin dhe sigurinë publike.
