Vendimi i sotëm i Kuvendit të Shqipërisë për të mos i hequr imunitetin Belinda Ballukut, ka sjellë një reagim të menjëhershëm nga Ambasada Gjermane në Tiranë, e cila ka dërguar një mesazh të fortë për politikën shqiptare dhe për mënyrën se si duhet të funksionojë drejtësia.
Në një deklaratë zyrtare, ambasada gjermane thekson se Gjermania mbështet procesin e integrimit të Shqipërisë në Bashkimin Evropian, por paralajmëron se përparimi në këtë rrugë varet nga ndjekja reale dhe efektive e korrupsionit, veçanërisht kur bëhet fjalë për figura të nivelit të lartë politik.
Reagimi vjen në një moment delikat, menjëherë pas votimit në Parlament, ku shumica vendosi të mos i japë drejtësisë mundësinë për të vijuar procedurat ndaj Ballukut. Në këtë kontekst, mesazhi i Berlinit shihet si një kujtesë e drejtpërdrejtë për klasën politike shqiptare se integrimi europian kërkon më shumë se deklarata – kërkon standarde të qarta në raportin mes politikës dhe drejtësisë.
Në deklaratën e saj, ambasada gjermane thekson:
“Gjermania mbështet procesin e integrimit të Shqipërisë në Bashkimin Evropian në përputhje me dëshirën e shqiptarëve. Kusht i domosdoshëm për të bërë progres në këtë proces të bazuar në merita është ndjekja penale me efektivitet e korrupsionit edhe në raste të rangut të lartë. Pritshmëria jonë e qartë është që edhe në këto raste ndjekja penale përmes drejtësisë të mund të realizohet shpejt dhe pa pengesa. Prej politikës shqiptare vazhdon të kërkohet ende që ta garantojë këtë proces.”
Mesazhi diplomatik interpretohet gjerësisht si një sinjal i fortë ndaj klasës politike shqiptare, duke nënvizuar se vendimet që mund të pengojnë hetimet ndaj zyrtarëve të lartë bien ndesh me standardet që kërkon Bashkimi Evropian.
Në thelb, reagimi i Berlinit rikujton se rruga drejt anëtarësimit në BE nuk matet me deklarata politike, por me veprime konkrete që tregojnë se drejtësia mund të veprojë e lirë, edhe kur përballë ka figura të pushtetit.
