Një kërkesë e publikuar në Fletoren Zyrtare zbulon një projekt që, edhe pse duket i mbështetur në procedura ligjore, ngre një sërë pikëpyetjesh mbi mënyrën se si përdoren fondet publike dhe si interpretohet “interesi publik”. Bëhet fjalë për shpronësimin e disa pronave private qё preken nga rezidenca e ambasadorit të Italisë në Shqipëri – një ndërhyrje që sipas vlerësimit paraprak kap shifrën e 459 milionë lekëve.
Formalisht, gjithçka paraqitet në përputhje me ligjin. Ministria për Evropën dhe Punët e Jashtme ka paraqitur kërkesën, ndërsa Agjencia Shtetërore për Shpronësimet ka nisur procedurat, duke njoftuar pronarët e prekur dhe duke përcaktuar një afat për ankimim. Vlerësimi i pronave është bërë mbi bazën e vendimeve ekzistuese të qeverisë për çmimet e tokës dhe ndërtesave.
Por a mund të konsiderohet rezidenca për një ambasador të huaj si “interes publik”?
Në praktikë, ky është një koncept që zakonisht lidhet me projekte që i shërbejnë drejtpërdrejt qytetarëve – rrugë, shkolla, spitale. Në këtë rast, kemi të bëjmë me një pronë rezidenciale diplomatike, funksioni i së cilës është i kufizuar dhe nuk prodhon përfitim të drejtpërdrejtë publik.
Shifrat e publikuara në tabelën shoqëruese e bëjnë edhe më të dukshme peshën e projektit. Një pjesë dërrmuese e fondit përqendrohet në një pronë të vetme, që arrin vlerën mbi 446 milionë lekë, ndërsa pjesa tjetër shpërndahet në prona më të vogla. Kjo krijon përshtypjen e një ndërhyrjeje të madhe në një zonë të kufizuar, me kosto të konsiderueshme për buxhetin publik.
Megjithatë, ajo që bie më shumë në sy nuk janë vetëm shifrat, por mënyra si është ndërtuar e gjithë procedura dhe mungesa e qartësisë mbi thelbin e ndërhyrjes. Nuk ka një shpjegim publik nëse bëhet fjalë për ndërtim të ri, zgjerim apo thjesht rikonfigurim të një pasurie ekzistuese. Po aq e paqartë mbetet edhe arsyeja pse është zgjedhur pikërisht kjo pronë private, duke çuar në shpronësim, dhe nëse janë shqyrtuar alternativa të tjera më pak të kushtueshme për buxhetin. Në këtë mungesë informacioni, e vetmja gjë e qartë mbetet vlera: një shumë e konsiderueshme fondesh publike që vihet në lëvizje pa një narrativë të plotë mbi përdorimin e saj.
© Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
