Një ndërhyrje për pastrimin e minave në Ngushticёn e Hormuzit po afrohet gjithnjë e më shumë, ndërsa liderët perëndimorë mblidhen në Paris për të diskutuar një nga nyjet më të rrezikshme të krizës aktuale. Samiti i thirrur nga Emmanuel Macron dhe Keir Starmer, ku pritet edhe pjesëmarrja e Giorgia Meloni, vjen në një moment kur tensionet në rajon mbeten të larta dhe çdo lëvizje mund të ketë pasoja globale.
Në tryezë është një plan konkret për çminimin e zonës, i cili mund të aktivizohet nëse armëpushimi mes Shteteve tё Bashkuara dhe Iranit zgjatet. I ashtuquajturi “Koalicioni i të Gatshmëve të Hormuzit”, me mbi 40 vende, duket më pranë se kurrë një veprimi të koordinuar për të rikthyer lirinë e lundrimit në një nga korridoret më jetike të energjisë në botë.
Megjithatë, sfidat mbeten të mëdha. SHBA-të, edhe pse protagoniste në terren përmes bllokadës detare, nuk janë pjesë formale e këtij koalicioni, ndërsa Teherani e ka kundërshtuar hapur planin. Zëdhënësi i Ministrisë së Jashtme iraniane, Esmaeil Baghaei, paralajmëroi se çdo ndërhyrje në Hormuz “do ta ndërlikonte situatën”, duke këmbëngulur se siguria e ngushticës mund të garantohet nga vetë vendet e rajonit, nëse ndalen ndërhyrjet dhe lufta.
Mosbesimi, megjithatë, është i thellë. Perëndimi nuk i beson garancive iraniane, veçanërisht pas kërcënimeve për mbylljen e rrugëve të tjera detare dhe propozimeve për vendosjen e një takse mbi anijet që kalojnë nëpër ngushticë – një ide që shihet si shkelje e hapur e së drejtës ndërkombëtare.
Ndërkohë, në terren, bllokada amerikane po jep efektet e saj. Sipas CENTCOM, në 48 orët e para asnjë anije nuk ka arritur të anashkalojë kontrollin në hyrje dhe dalje të porteve iraniane. Tetë ҫisterna nafte janë detyruar të ndryshojnë kurs, ndërsa vetëm një anije, Alicia, sipas mediave iraniane, ka arritur të kalojë.
Situata mbetet e paqëndrueshme dhe çdo zhvillim reflektohet menjëherë në tregjet globale të energjisë, duke rritur pasigurinë për furnizimet me naftë dhe gaz. Në këtë klimë tensioni, Presidenti i Këshillit Evropian, Antonio Costa, ka bërë thirrje për përmbajtje dhe dialog, duke paralajmëruar se mbyllja e Hormuzit tashmë ka sjellë pasoja “katastrofike”.
Mes diplomacisë dhe presionit ushtarak, një gjë mbetet e qartë: çdo zgjidhje e qëndrueshme nuk mund të vijë nga forca. Në të kundërt, siç paralajmërojnë liderët evropianë, alternativa është një rajon që rrëshqet drejt kaosit – dhe një botë që paguan çmimin.
(Burimi: ANSA)
