Japonia ka prezantuar një term të ri për të përshkruar ditët me temperatura ekstreme mbi 40 gradë Celsius, pas një vere rekord që theu çdo precedent historik. Fjala e re, “kokushobi”, përkthehet si “mizorisht i nxehtë” apo “brutalisht i nxehtë” dhe synon të reflektojë më saktë intensitetin e valëve të fundit të të nxehtit.
Termi u zgjodh përmes një sondazhi kombëtar online me rreth 478 mijë pjesëmarrës, ku rezultoi më i votuari mes 13 alternativave. Ai u prezantua zyrtarisht nga Agjencia Meteorologjike e Japonisë, duke shtuar një kategori të re përtej klasifikimeve ekzistuese për ditët mbi 25°C, 30°C dhe 35°C.
Vendimi vjen pas një viti alarmues: vera e 2025-ës ishte më e nxehta që nga fillimi i regjistrimeve në vitin 1898, me temperatura mesatare 2.36°C mbi normën. Në periudhën qershor–gusht, vendi regjistroi nëntë ditë me temperatura mbi 40°C, ndërsa në qytetin Isesaki u arrit rekordi kombëtar prej 41.8°C.
Edhe qytetet kryesore përjetuan një rritje drastike të ditëve ekstreme. Tokio regjistroi 25 ditë mbi 35°C (nga një mesatare historike prej 4.5 ditësh), ndërsa Kioto arriti në 52 ditë, krahasuar me një mesatare prej 18.5 ditësh.
Autoritetet japoneze paralajmërojnë se trendi do të vijojë: për këtë verë parashikohet një probabilitet i lartë për temperatura mbi normalen në të gjithë vendin. Ndryshimet klimatike dhe valët gjithnjë e më të shpeshta të të nxehtit po detyrojnë jo vetëm masa praktike, por edhe një gjuhë të re për të përshkruar realitetin ekstrem.
