Kjo e enjte mund të shënojë një nga momentet më të rëndësishme në betejën ligjore të Erion Veliajt.
Në orën 13:05, Gjykata e Lartë pritet të shqyrtojë rekursin e paraqitur nga kryebashkiaku i Tiranës, i cili kërkon ndryshimin e masës së sigurisë nga “arrest në burg” në një masë më të lehtë, si “detyrim paraqitjeje” ose lirim kundrejt garancisë pasurore.
Pas muajsh të tërë në paraburgim dhe disa kërkesave të rrëzuara njëra pas tjetrës nga gjykatat, kjo është hera e parë që çështja rikthehet për rishqyrtim pas ndërhyrjes së Gjykatës Kushtetuese.
Pak ditë më parë, Kushtetuesja pranoi pjesërisht kërkesën e Veliajt, rrëzoi vendimin e mëparshëm të Kolegjit Penal të Gjykatës së Lartë dhe urdhëroi rishqyrtimin e çështjes. Edhe pse nuk hyri në themelin e akuzave të SPAK-ut, Gjykata Kushtetuese konstatoi probleme në mënyrën si ishte trajtuar masa e sigurisë ndaj kryebashkiakut.
Ky zhvillim i dha Veliajt mundësinë për një tjetër përballje juridike me SPAK-un, në një moment kur beteja nuk është më vetëm penale, por edhe politike dhe institucionale.
Sot pritet të shihet nëse Gjykata e Lartë do të lërë sërish në fuqi “arrestin në burg”, apo do të hapë rrugën për lirimin e tij dhe rikthimin në zyrë, të paktën deri në përfundim të shqyrtimit gjyqësor.
Veliaj ndodhet në paraburgim që prej shkurtit 2025 dhe gjatë gjithë kësaj periudhe ka insistuar se masa ndaj tij është e pajustifikuar dhe disproporcionale. Nga ana tjetër, SPAK ka këmbëngulur vazhdimisht se ekzistojnë kushtet ligjore për mbajtjen e tij në qeli.
Vendimi i sotëm pritet me interes të lartë jo vetëm nga kampi politik i mazhorancës dhe opozitës, por edhe nga vetë Bashkia e Tiranës, e cila prej muajsh funksionon nën hijen e krizës institucionale dhe hetimeve të SPAK-ut.
Nëse Gjykata e Lartë vendos ndryshimin e masës, Erion Veliaj mund të dalë nga paraburgimi dhe të tentojë rikthimin në drejtimin politik të Bashkisë së Tiranës.
Nëse masa mbetet në fuqi, beteja e tij do të vazhdojë nga qelia.
