Administrata e presidentit amerikan Donald Trump ka njoftuar nisjen e një fushate globale kundër asaj që e cilëson si “terrorizëm i majtë radikal”, duke e trajtuar këtë fenomen me të njëjtën qasje që është përdorur ndër vite kundër terrorizmit xhihadist.
Nisma u prezantua gjatë një takimi me zyrtarë të lartë nga vende të ndryshme të botës, ku administrata amerikane deklaroi se ekstremizmi i majtë përbën një kërcënim ndërkombëtar që kërkon bashkëpunim të koordinuar mes shteteve.
Sekretari amerikan i Shtetit, Marco Rubio, tha se politika kundër terrorizmit ka pasur për vite me radhë një “pikë të verbër” ndaj dhunës së ekstremit të majtë.
“Doktrina jonë kundër terrorizmit ka neglizhuar dhunën ekstremiste të së majtës. Edhe sot, ideja se terrorizmi i majtë mund të përbëjë një kërcënim serioz shpesh trajtohet si një teori e skajshme e së djathtës,” u shpreh Rubio.
Sipas tij, sulmet dhe komplotet e lidhura me grupet e majta radikale në SHBA kanë arritur nivelin më të lartë të dekadave të fundit.
Rubio pretendoi gjithashtu se grupet ekstremiste bashkëpunojnë në nivel ndërkombëtar.
“Militantët e Antifa-s dhe aleatët e tyre udhëtojnë midis Evropës dhe Amerikës për të marrë pjesë në sulme, shkëmbejnë propagandë, trajnime dhe informacione për objektiva përmes kanaleve të koduara dhe financojnë aktivitetet e tyre përmes rrjeteve ndërkombëtare,” deklaroi ai.
Edhe Sekretari i Thesarit, Scott Bessent, njoftoi masa të reja për të identifikuar dhe bllokuar burimet e financimit të organizatave që, sipas administratës amerikane, përdorin statusin e organizatave bamirëse ose jofitimprurëse për aktivitete të paligjshme.
“Do të identifikojmë financimet e paligjshme, pavarësisht mënyrës se si fshihen. Do të çmontojmë rrjetet që mbështesin terrorizmin politik dhe do të ndjekim penalisht ata që mundësojnë dhunën politike,” tha Bessent.
Këshilltari për Sigurinë Kombëtare, Stephen Miller, deklaroi se administrata nuk do të tërhiqet nga kjo politikë, duke argumentuar se grupet e majta radikale përdorin retorikën mbi liritë civile për të mbuluar aktet e dhunës.
Sipas Miller, SHBA ka ndërmarrë tashmë hapa konkretë duke njohur zyrtarisht dhunën e ekstremit të majtë si një formë terrorizmi politik që përbën kërcënim për sigurinë kombëtare.
Shtëpia e Bardhë tha se kjo është pjesë e një fushate afatgjatë për të çrrënjosur ideologjitë e dhunshme që, sipas saj, sulmojnë policinë, qytetarët dhe institucionet demokratike.
Administrata Trump rikujtoi gjithashtu se vitin e kaluar e shpalli Antifa-n organizatë terroriste brenda SHBA-së dhe se tashmë po punon me partnerët ndërkombëtarë për të goditur financimin, strehimin dhe aktivitetet ndërkufitare të grupeve që konsiderohen pjesë e këtij rrjeti.
Burimi: Shtёpia e Bardhё
