Britania e Madhe mund të përballet me mungesa të produkteve ushqimore në supermarkete nëse në zonat më të thata të vendit nuk bien reshje shiu gjatë 10 ditëve të ardhshme. Paralajmërimi vjen nga fermerët, të cilët thonë se periudha e ardhshme do të jetë vendimtare për prodhimin bujqësor të këtij viti.
Pjesë të Anglisë jugore dhe lindore nuk kanë regjistruar asnjë pikë shiu gjatë këtij muaji, duke shënuar periudhën më të gjatë pa reshje në 30 vitet e fundit. Në shkallë kombëtare, Anglia ka marrë vetëm 3% të sasisë mesatare të reshjeve që regjistrohen zakonisht në korrik.
Temperaturat e larta dhe tre valët e të nxehtit të këtij sezoni kanë tharë tokat, lumenjtë dhe përrenjtë, ndërsa konsumi i ujit është rritur ndjeshëm. Për pasojë, shumë zona janë shpallur në gjendje të motit të thatë të zgjatur, faza që i paraprin zyrtarisht thatësirës.
Sipas Unionit Kombëtar të Fermerëve (NFU), mungesa e reshjeve po dëmton drithërat, ndërsa rendimenti i elbit pranveror pritet të jetë më i ulët. Në disa zona të Anglisë Lindore fermerët janë detyruar të ndalojnë marrjen e ujit nga lumenjtë, pasi nivelet kanë rënë në minimum.
Ekspertët paralajmërojnë se nëse nuk bie shi gjatë javës së ardhshme, pasojat mund të ndihen në furnizimin me produkte ushqimore më vonë gjatë vitit. Për këtë arsye fermerët i kanë kërkuar autoriteteve të tregojnë fleksibilitet në përdorimin e burimeve ujore për vaditje.
Ndërkohë, thatësira ka rritur edhe rrezikun e zjarreve, ndërsa dëme po pëson edhe fauna. Nivelet e ulëta të ujit po ndikojnë në shumimin e disa llojeve të amfibëve dhe po pengojnë migrimin e salmonit në lumenj.
Shërbimi Meteorologjik britanik parashikon mundësi reshjesh në fundjavë, por kryesisht në veri të vendit. Për jugun e Anglisë, meteorologët paralajmërojnë se moti i thatë mund të vazhdojë edhe gjatë javëve në vijim, duke mbajtur të lartë rrezikun për bujqësinë dhe furnizimin me ushqime.
Burimi: The Indipendent
