Nuk tregon asgjë të re nëse thua: “Në Shqipëri karriera akademike ecën paralelisht me karrierën politike ose nepotike”. Shembujt janë me dhjetëra, sa të krijohet përshtypja se në “akademizmin” tonë, të jesh apo bëhesh Profesor ose Doktor është po aq e thjeshtë sa të kesh një diplomë ekselente si ajo e Zegjinesë.
Emrat e kandidatëve fitues për programin e doktoraturës në Fakultetin e Drejtësisë, për kuriozitetin e të gjithëve, u publikuan të anonimizuar vetëm me numra identiteti.
Pse? Në vendin ku të dhënat personale të qytetarëve u bënë disa herë sport popullor në rrjetet e komunikimit social, kandidat-doktorët mbahen sekret.
Nuk ka se si të ketë elemente personale kandidimi për një program doktorature në universitet. Nuk është turp të konkurrosh, madje nuk është fatale edhe të mos fitosh.
Përkundrazi, rruga që të çon drejt fitimit të gradës shkencore “Doktor”, duhet të jetë një procedurë publike, sepse “grada” nuk vlen vetëm për karrierën e individit, por dhe për interesin publik.
“Doktori” nesër do të jetë pedagog, studiues, anëtar komisionesh, drejtues institucionesh akademike, pra do të bëhet ai vetë vlerësuesi i të tjerëve. Pikërisht për këtë arsye, opinioni publik ka të drejtë të informohet me transparencë për akademikët e tij të ardhshëm.
Kush janë emrat?
Burimet nga brenda fakultetit “rrjedhin” padashur disa emra.
Departamenti i së Drejtës Publike
- Elona Hoxha
- Nensi Hoxha
- Aida Hoxha
- Shkëlqim Allkaj
Departamenti i së Drejtës Penale
- Bledar Maksuti
- Vladimir Mara
- Maend Kullaj
- Sonora Manja
Departamenti i së Drejtës Civile
- Nurjeta Pogaçe
- Fiordi Pernaska
- Rezarta Abdiu
Bie në sy se ndër emrat e kandidatëve të kualifikuar rezultojnë vajza e ish-ministrit të Drejtësisë, Ulsi Manja, vajza e rektorit të Universitetit të Tiranës, Artan Hoxha, zëvendësministrja e Drejtësisë, Elona Hoxha, dy prokurorët e SPAK, Bledar Maksuti dhe Vladimir Mara, vajza e ish-kryetarit të Gjykatës Kushtetuese, Fehmi Abdiu, motra e gjyqtarit Altin Abdiu, Shefi i Kurrikulës dhe Cilësisë në Ministrinë e Arsimit dhe Sportit, Shkëlqim Allkaj, gjyqtarja e Gjykatës së Parë të Juridiksionit të Përgjithshëm Durrës, Nurjeta Pogaçe (Tafa), noterja Aida Hoxha.
Emrat lënë shumë vend për komente. Për disa prej tyre, shtrohet natyrshëm pyetja se kur dhe si do të zhvillojnë kërkimin shkencor, seminaret, shkollën doktorale dhe punën kërkimore që kërkon një gradë e tillë, ata që do të kenë impenjim në sistemin e ngjeshur të drejtësisë?
Nuk paragjykohen këta individë, as dekurajohen, por pyetja lind vetvetiu në momentin që universiteti zgjedh t’u fshehë emrat e tyre në vend që t’i bëjë publikë.
Askush nuk i mohon të drejtën për të ndjekur studimet doktorale të gjithëve, madje edhe bijës së Ulsi Manjës apo të rektorit Artan Hoxha, por është po aq e vërtetë se pozicioni “nepotik” hap dyer që hapen më me lehtësi për ata, sesa për një nëpunës të zakonshëm të administratës, apo individ që nuk vjen nga një enturazh politik.
© Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
