Një moment i pazakontë ka shoqëruar përurimin e statujës së legjendës japoneze të bejsbollit Ichiro Suzuki në qytetin e Siatëllit në Shtetet e Bashkuara, pasi vepra u dëmtua pikërisht në çastin kur u zbulua para publikut.
Ndërsa mbulesa blu u hoq nga statuja, të pranishmit dëgjuan një zhurmë kërcitjeje dhe figura prej bronzi u duk sikur u “ul” lehtë, duke zbuluar se shkopi i bejsbollit në duart e saj ishte thyer. Vetë Suzuki, 52 vjeç, reagoi fillimisht me habi, por më pas e mori situatën me sportivitet duke qeshur.
Statuja ishte vendosur jashtë stadiumit T-Mobile Park, në nder të një prej karrierave më të mëdha në historinë e bejsbollit. Një vit më parë, Suzuki ishte votuar pothuajse unanimisht në Sallën Kombëtare të Famës së Bejsbollit.
Gjatë 18 viteve në Ligën Kryesore të Bejsbollit në SHBA, ai shkëlqeu sidomos me ekipin Seattle Mariners, ku kaloi 12 sezone, përpara se të luante edhe për New York Yankees dhe Miami Marlins. Në fund të karrierës, ai u rikthye sërish te Mariners për dy sezonet e fundit.
Drejtuesi i klubit, John Stanton, vlerësoi përkushtimin dhe profesionalizmin e Suzuki-t, duke e cilësuar atë “plotësisht të denjë për këtë nderim të përjetshëm”.
Statuja, e realizuar nga skulptori Lou Cella, e paraqet lojtarin në pozën e tij karakteristike, me uniformën e sezonit debutues të vitit 2001. Vetë Suzuki tregoi se kishte marrë pjesë në proces, duke veshur sërish uniformën për të ndihmuar në krijimin sa më realist të veprës.
Pavarësisht incidentit, klubi reagoi me humor në rrjetet sociale, duke publikuar një version simbolik të statujës me shkop të thyer.
Ichiro Suzuki, i cili u tërhoq nga sporti në vitin 2019, mbetet një nga figurat më ikonike të bejsbollit botëror. Ai theu rekorde historike, përfshirë atë të goditjeve në një sezon të vetëm në vitin 2004, kur arriti 262 goditje, duke kaluar rekordin e mbajtur prej dekadash nga George Sisler.
Pavarësisht nisjes jo perfekte të ceremonisë, statuja e tij tashmë qëndron si një simbol i një karriere të jashtëzakonshme – dhe i një momenti që do të mbahet mend gjatë nga tifozët.
