Pesë nga bankat më të mëdha të Gjermanisë kanë nisur një betejë të madhe ligjore kundër kompanisë industriale Linde plc, duke kërkuar rikuperimin e qindra milionë eurove të humbura pas dështimit të një projekti miliardë dollarësh për përpunimin e gazit në Rusi.
Sipas Alliance News, në proces janë përfshirë Deutsche Bank, Commerzbank, Bayerische Landesbank (BayernLB), Landesbank Baden-Württemberg (LBBW) dhe HypoVereinsbank (HVB), filial i grupit italian UniCredit.
Mosmarrëveshja lidhet me një projekt me vlerë rreth 5 miliardë dollarë, të zhvilluar nga Ruschemalliance, një sipërmarrje e përbashkët e kontrolluar nga Gazprom dhe RusGasDobycha. Linde kishte marrë paraprakisht 1.2 miliardë dollarë, të garantuara nga një konsorcium bankash gjermane.
Pas pushtimit rus të Ukrainës dhe vendosjes së sanksioneve perëndimore, projekti u ndërpre. Bankat refuzuan të ekzekutonin garancitë financiare, ndërsa Ruschemalliance arriti të sigurojë në gjykatat ruse sekuestrimin e aktiveve dhe fondeve të bankave që operonin në Rusi.
Sipas dokumenteve të depozituara në gjykatat britanike, humbjet e pretenduara janë:
- 448 milionë euro për HypoVereinsbank (HVB);
- 273 milionë euro për BayernLB;
- 244 milionë euro për Deutsche Bank;
- 93.5 milionë euro për Commerzbank;
- 52 milionë euro për LBBW.
Meqenëse bankat nuk mund të ndërmarrin veprime të drejtpërdrejta kundër palës ruse për shkak të një urdhri gjyqësor që ndalon procese paralele, ato kanë vendosur t’i drejtohen gjykatave kundër vetë kompanisë Linde, duke kërkuar dëmshpërblim për humbjet e pësuara.
Deutsche Bank do të përballet së shpejti me seancën e parë në Gjykatën Rajonale të Frankfurtit dhe ka deklaruar se e konsideron të drejtën e saj për rimbursim të mbështetur ligjërisht, duke përfshirë jo vetëm shumën kryesore të pretenduar, por edhe interesat.
Edhe Commerzbank dhe HypoVereinsbank kanë nisur procedura gjyqësore në gjykatat e Mynihut. Nga ana e saj, UniCredit ka konfirmuar në raportet financiare se filiali i saj HVB po ndërmerr të gjitha veprimet ligjore për të mbrojtur të drejtën e rikursit ndaj palëve që i konsideron përgjegjëse.
Kompania Linde ka pranuar ekzistencën e mosmarrëveshjes, duke deklaruar se çështja përfshin elemente komplekse faktike dhe juridike dhe se procesi pritet të jetë i gjatë.
Burimi: Alliance News
