Një ushtar i forcave speciale amerikane është arrestuar pasi dyshohet se ka përfituar mbi 400 mijë dollarë duke vënë baste mbi një operacion sekret – operacion në të cilin ai vetë ishte i përfshirë.
Sipas aktakuzës, rreshteri i lartë amerikan Gannon Ken Van Dyke kishte hapur një llogari në platformën e basteve “Polymarket” në fund të dhjetorit dhe kishte vënë rreth 32 mijë dollarë bast se presidenti venezuelian Nicolás Maduro do të largohej nga pushteti brenda janarit.
Parashikimi dukej i pamundur – por rezultoi i saktë.
Prokurorët thonë se Van Dyke ishte pjesë e planifikimit dhe zbatimit të operacionit sekret “Absolute Resolve”, përmes të cilit Maduro u kap gjatë një aksioni nate në Karakas dhe më pas u ekstradua në SHBA për t’u përballur me akuza për trafik droge.
Kjo do të thotë se ushtari kishte akses në informacion të klasifikuar përpara se të vendoste bastet.
Sipas hetimeve, ai bëri 13 baste mes 27 dhjetorit dhe 2 janarit, madje edhe disa orë para kapjes së Madurës. Fitimet e tij arritën mbi 400 mijë dollarë, të cilat ai i transferoi fillimisht në një portofol kriptomonedhash jashtë vendit dhe më pas në një llogari investimi online, në një përpjekje për të fshehur origjinën e tyre.
Van Dyke tashmë përballet me disa akuza penale, përfshirë keqpërdorim të informacionit sekret, mashtrim dhe vjedhje.
Autoritetet amerikane e konsiderojnë rastin një shkelje serioze të besimit. “Ata që kanë detyrën të mbrojnë sekretet e shtetit nuk mund t’i përdorin ato për përfitim personal”, deklaroi prokurori federal.
Rasti ka nxitur gjithashtu debat mbi rritjen e platformave të basteve mbi ngjarje politike dhe gjeopolitike, ku përdoruesit mund të fitojnë shuma të mëdha duke parashikuar zhvillime reale – një treg që po rritet me miliarda dollarë çdo javë.
Vetë Presidenti Donald Trump reagoi duke krahasuar rastin me një sportist që vë bast për ekipin e tij, duke e cilësuar fenomenin si shqetësues në një botë që, sipas tij, “po kthehet gjithnjë e më shumë në një kazino”.
Ndërkohë, hetimet vazhdojnë për të përcaktuar shkallën e plotë të përfshirjes dhe nëse ka pasur persona të tjerë që kanë përfituar nga informacioni sekret.
(Burimi: CNN)
