Britania e Madhe dhe 45 vende të tjera europiane kanë firmosur një marrëveshje politike që mbështet zyrtarisht dërgimin e azilkërkuesve të refuzuar në qendra pritjeje jashtë Europës.
Deklarata është miratuar nga anëtarët e Këshillit të Europës, institucioni që mbikëqyr Konventën Europiane për të Drejtat e Njeriut (ECHR), dhe thekson se shtetet kanë “të drejtë sovrane të pamohueshme” për të kontrolluar kufijtë e tyre.
Sipas raportimit, qeveria britanike po kërkon tashmë një marrëveshje me një vend të tretë, në një model të ngjashëm me marrëveshjen Itali-Shqipëri, ku Roma ngriti qendra pritjeje në territorin shqiptar për emigrantët e paligjshëm.
Dokumenti shtatëfaqësh mbështet krijimin e të ashtuquajturave “pika tё kthimit”, qendra ku mund të dërgohen emigrantët ose azilkërkuesit e refuzuar, si pjesë e përpjekjeve për të frenuar emigracionin e paligjshëm.
Në deklaratë thuhet se shtetet duhet të jenë të lira të “adresojnë dhe potencialisht të dekurajojnë emigracionin e parregullt”, duke përfshirë:
- përpunimin e kërkesave për azil në vende të treta;
- ngritjen e qendrave të kthimit jashtë territorit europian;
- bashkëpunimin me vendet tranzit.
Marrëveshja synon gjithashtu t’u japë më shumë hapësirë qeverive për deportimin e emigrantëve, edhe në raste kur ekzistojnë shqetësime për trajtim çnjerëzor apo degradues në vendet ku do të dërgohen.
Kjo çështje ka ndezur debat të fortë politik në Britani. Kryeministri Keir Starmer mbështet reformimin e Konventës Europiane të të Drejtave të Njeriut, ndërsa konservatorët dhe Reform UK kërkojnë largimin e plotë nga ECHR.
Ministri i Jashtëm britanik deklaroi se qeveria laburiste po përpiqet të reformojë sistemin “pa shkatërruar ligjin ndërkombëtar”, duke sulmuar si konservatorët ashtu edhe partitë e majta për qëndrimet e tyre ekstreme mbi emigracionin.
Nga ana tjetër, organizatat për të drejtat e njeriut kanë reaguar me shqetësim. Drejtoresha e organizatës Liberty, Akiko Hart, paralajmëroi se ndryshimi i mënyrës së interpretimit të ECHR mund të hapë rrugën për dobësimin gradual të mbrojtjes së të drejtave themelore.
(Burimi: The Guardian)
