Një infermiere britanike është dënuar me burg pasi krijoi një lidhje intime me një pacient të shtruar në një spital psikiatrik, me të cilin më pas mbeti edhe shtatzënë.
Lydia-May Green, 30 vjeçe, pranoi para gjykatës shtatë akuza për marrëdhënie seksuale të paligjshme me një person me çrregullime mendore, gjatë periudhës shkurt–tetor 2024.
Sipas mediave britanike, lidhja mes tyre zgjati rreth tetë muaj dhe u zbulua pasi në telefonin e infermieres u gjetën video dhe fotografi intime të çiftit, përfshirë pamje ku ata shfaqeshin gjysmë të zhveshur në shtrat, duke u përqafuar e puthur, si edhe video me përmbajtje seksuale në automjet.
Pacienti, identiteti i të cilit nuk bëhet publik për arsye ligjore, vuante nga autizmi, ADHD dhe çrregullime të rënda të shëndetit mendor, përfshirë çrregullimin skizoafektiv. Ai ishte transferuar në një institucion psikiatrik në vitin 2020 sipas Aktit të Shëndetit Mendor, pasi më herët ishte dënuar me 10 vite burg për plagosje me dashje.
Green kishte nisur punë në spital në vitin 2021 si studente praktike dhe më pas u kualifikua si infermiere në vitin 2024. Sipas gjykatës, ajo u bë shpejt një nga personat më të afërt për pacientin dhe kalonin shumë kohë bashkë.
Në shkurt 2024, pacienti i kishte shkruar asaj në Instagram duke e quajtur “gruaja më e bukur në botë”. Më pas lidhja mes tyre u forcua dhe infermierja rezervoi disa herë hotele në Bristol dhe Uells për të kaluar kohë me të, gjatë periudhave kur ai lejohej të dilte nga institucioni.
Në dhjetor 2024, Green zbuloi se ishte shtatzënë dhe ia komunikoi lajmin pacientit, i cili e quante atë “mami i bebit”. Gjykata dëgjoi se më vonë ajo pësoi abort spontan dhe i kishte dërguar pacientit fotografi nga aborti.
Marrëdhënia mori fund në prag të Vitit të Ri, kur Green i shkroi një letër lamtumire. Pak ditë më vonë, më 10 janar 2025, pacienti informoi stafin e spitalit për lidhjen dhe tregoi fotografi të tyre së bashku.
Hetimet zbuluan gjithashtu se infermierja kishte tentuar të fshinte materiale nga telefoni, në atë që prokuroria e konsideroi përpjekje për të zhdukur provat.
Prokurori William Eaglestone tha se lidhja mund t’i ketë shkaktuar pacientit “dëme të konsiderueshme psikologjike” dhe mund të ketë ndikuar negativisht edhe në mundësinë e tij për t’u liruar nga institucioni.
Nga ana tjetër, avokati mbrojtës argumentoi se marrëdhënia kishte qenë konsensuale dhe se pacienti kishte qenë ai që e kishte ndjekur vazhdimisht infermieren. Sipas tij, Green kishte bërë “gabimin më të madh të jetës së saj” pasi ishte përfshirë emocionalisht dhe “kishte rënë në dashuri me të”.
(Burimi: Mirror)
