Bashkimi Evropian po përgatitet të ndryshojë për herë të parë dizajnin e kartëmonedhave euro që prej hyrjes së tyre në qarkullim në vitin 2002, duke u dhënë qytetarëve mundësinë të vendosin se çfarë do të përfaqësojë identitetin evropian në të ardhmen.
Banka Qendrore Evropiane (BQE) ka prezantuar 10 propozime finale, të ndara në dy tema kryesore: personalitete të shquara të kulturës evropiane ose natyra dhe fauna e kontinentit.
Në variantin e parë, kartëmonedhat mund të mbajnë portretet e figurave si Maria Callas, Ludwig van Beethoven, Marie Curie, Miguel de Cervantes, Leonardo da Vinci dhe Bertha von Suttner, të shoqëruara në anën e pasme me skena që pasqyrojnë jetën kulturore, artistike dhe shkencore të Evropës.
Alternativa tjetër vë në qendër natyrën evropiane, me zogj karakteristikë si lejleku i bardhë, bletëngrënësi (bee-eater), martini i ujit (kingfisher), të paraqitur mbi peizazhe të ndryshme të kontinentit.
Sipas presidentes së BQE-së, Christine Lagarde, qëllimi është që kartëmonedhat e reja të pasqyrojnë më mirë identitetin dhe vlerat e përbashkëta evropiane.
Interesi i publikut ka qenë i madh. Vetëm gjatë javës së parë të konsultimit online, mbi 6 milionë persona morën pjesë në votim për të shprehur preferencën e tyre.
Procesi nuk do të vendoset vetëm nga vota e qytetarëve. Përzgjedhja finale do të bazohet edhe në një sondazh të dytë, si dhe në vlerësimin e një jurie ndërkombëtare dizajnerësh. Nuk pritet të zgjidhet një kombinim i dy temave; fituese do të jetë vetëm njëra prej tyre.
Kartëmonedhat e reja do të vazhdojnë të prodhohen në letër, dhe jo në polimer si në disa vende të tjera, ndërsa ato pritet të hyjnë në qarkullim gjatë viteve 2030–2031.
Sipas Bankës Qendrore Evropiane, mesazhi që ka ardhur nga qytetarët është i qartë: ata duan para që të duken dhe të ndihen më evropiane.
