Lançimi i një ore me edicion të kufizuar nga Swatch është kthyer në kaos në disa vende të Europës dhe SHBA-së, duke detyruar kompaninë të mbyllë përkohësisht dyqanet e saj pas turmave masive, përleshjeve dhe ndërhyrjes së policisë.
Ora “Royal Pop”, e realizuar në bashkëpunim me markën luksoze zvicerane Audemars Piguet, shkaktoi një ethe të vërtetë mes koleksionistëve dhe rishitësve, me njerëz që pritën me ditë të tëra jashtë dyqaneve për ta siguruar.
Në Paris, policia përdori gaz lotsjellës për të shpërndarë një turmë prej rreth 300 personash jashtë një dyqani Swatch, pasi situata doli jashtë kontrollit dhe u dëmtuan hyrjet e sigurisë. Autoritetet franceze thanë se organizatorët kishin nënvlerësuar masat e nevojshme për sigurinë.
Skena të ngjashme u regjistruan edhe në Britaninë e Madhe. Në Londër, forcat e policisë vendosën qen policie pranë qendrave tregtare Battersea dhe Westfield, ndërsa në Birmingham u aktivizua një urdhër shpërndarjeje për turmat. Në Cardiff, një 25-vjeçar u arrestua gjatë incidenteve.
Pamje të publikuara në rrjetet sociale treguan njerëz që shtynin barrierat e sigurisë dhe përplasje fizike pranë dyqaneve në Manchester dhe Trafford Centre. Për shkak të situatës, Swatch mbajti të mbyllura dyqanet në Manchester dhe Liverpool edhe të dielën.
Në Itali, një përleshje shpërtheu jashtë dyqanit Swatch në Milano sapo u hapën dyert, ndërsa në Holandë policia ndërhyri në një qendër tregtare pranë Hagës pasi qindra persona u dyndën drejt dyqanit.
Edhe në SHBA situata ishte e tensionuar. Në Times Square të New York-ut pati shtyrje dhe rrëmujë mes klientëve që prisnin prej ditësh në radhë. Disa blerës pranuan hapur se synimi ishte rishitja e menjëhershme e orës me çmime shumë më të larta.
Ora “Royal Pop” shitet zyrtarisht për rreth 400 dollarë në SHBA dhe 335 paund në Britani, por vetëm pak orë pas lançimit ajo nisi të shfaqej në eBay për deri në 3 mijë paund.
Një blerës në New York deklaroi se kishte pritur pesë ditë në radhë për të siguruar orën, të cilën më pas e kishte shitur për 4 mijë dollarë.
Ndërkohë, një tjetër klient tha se kishte preferuar të paguante 2,400 dollarë për orën sesa të përballej me radhët dhe kaosin.
Pas incidenteve, Swatch u detyrua të reagojë publikisht duke u bërë thirrje klientëve të mos grumbullohen masivisht pranë dyqaneve.
(Burimi: The Guardian)
