Një defekt i përmasave kombëtare në sistemin e kartave të kreditit shkaktoi kaos në Japoni këtë të enjte, duke lënë mijëra qytetarë të paaftë për të kryer pagesa, për të bërë blerje apo për të përdorur disa shërbime të transportit publik.
Sipas agjencisë Kyodo News, problemet u shfaqën në dyqane, supermarkete dhe pika të tjera shitjeje, ku pagesat me kartë nuk mund të përpunoheshin. Ndërkohë, udhëtarët që përdorin rrjetin hekurudhor të East Japan Railway hasën vështirësi në blerjen e abonimeve për transport.
Shkaku i ndërprerjes nuk është bërë ende i ditur.
Kompania Mitsubishi UFJ NICOS, një nga ofruesit më të mëdhenj të kartave të kreditit në Japoni, njoftoi se problemet nisën rreth orës 08:00 të mëngjesit sipas orës lokale, kur pagesat me kartë nuk mund të përpunoheshin në një pjesë të dyqaneve. Edhe kompania Sumitomo Mitsui Card raportoi probleme të ngjashme me sistemin e saj të pagesave.
Në Tokio, defekti preku edhe aplikacionin Mobile Pasmo, i përdorur gjerësisht për akses në transportin publik, duke krijuar vështirësi shtesë për mijëra udhëtarë.
Autoritetet dhe kompanitë financiare po punojnë për rikthimin e plotë të shërbimit, ndërsa hetimet për të zbuluar shkakun e defektit vazhdojnë.
Burimi: AA / Kyodo News
