Në një kohë kur telefoni inteligjent është kthyer në “trurin e dytë” të njerëzve, gjithnjë e më shumë persona po provojnë atë që quhet “detoksifikim dixhital” – një shkëputje e përkohshme nga smartphone-i dhe rrjetet sociale për të rikuperuar fokusin, energjinë dhe qetësinë mendore.
Gazetarja Antoinette Radford vendosi të bënte pikërisht këtë eksperiment: të fikte smartfonin për një javë të tёrё dhe të jetonte vetëm me një telefon të thjeshtë, pa rrjete sociale, njoftime apo aplikacione. Rezultati? Shumë më i vështirë sesa kishte imagjinuar.
Ajo tregoi se vendimi erdhi pasi ishte bombarduar nga reklama dhe paralajmërime për efektet që telefonat dhe rrjetet sociale kanë mbi lodhjen mendore, vetëvlerësimin dhe përqendrimin. Sipas neuroshkencëtarit Tj Power, i cili studion varësinë nga telefoni, truri modern është “tejstimuluar” nga dopamina që krijojnë aplikacionet dhe rrjetet sociale.
Eksperimenti nisi me vështirësi që në ditën e parë. Gazetarja kuptoi se telefoni ishte bërë pjesë e pandashme e rutinës së saj: pagesat bankare, hyrja në email, porositë online, transporti, kontaktet dhe madje alarmet nё telefon për aktivitetet e ditës. Ajo u detyrua të blinte një axhendë fizike për të shënuar takimet dhe një telefon të thjeshtë rezervë vetëm për emergjenca.
Por sfida më e madhe nuk ishte praktike – ishte psikologjike. Vetëm pas disa ditësh pa smartphone, ajo nisi të ndjente lodhje të fortë, mungesë energjie dhe ankth. Eksperti i shpjegoi se shumë njerëz nuk e kuptojnë sa të lodhur janë realisht, sepse telefoni dhe stimujt e vazhdueshëm “maskojnë” lodhjen e trurit.
Megjithatë, eksperimenti solli edhe efekte pozitive. Ajo vuri re më shumë detaje përreth, nisi të mbante mend gjëra pa kontrolluar vazhdimisht telefonin dhe ndjeu se kujtesa po përmirësohej. Në mungesë të muzikës, njoftimeve dhe “scroll”-it të pafund, ajo u ndje më e pranishme në realitetin përreth.
Pavarësisht vështirësive, gazetarja pranoi se eksperimenti e bëri të kuptonte sa shumë ishte bërë e varur nga telefoni dhe rrjetet sociale. Në fund të javës, ajo vendosi t’ia përsëriste vetes këtë “detoks” edhe në të ardhmen, për të rikthyer kontrollin mbi kohën dhe vëmendjen e saj.
(Burimi: Përshtatur nga CNN)
