Më 21 qershor, në ditën më të gjatë të vitit, miliona njerëz në mbarë botën festouan Ditën Botërore të Muzikës, një ngjarje që i kushtohet fuqisë bashkuese të artit dhe rolit të muzikës në jetën e përditshme.
Kjo festë u themelua në Francë në vitin 1982 me iniciativën e ministrit të Kulturës, Jack Lang, dhe kompozitorit Maurice Fleuret. Qëllimi i saj ishte i qartë: t’u jepte mundësi muzikantëve profesionistë dhe amatorë të dilnin para publikut dhe të ndanin pasionin e tyre për muzikën në mënyrë të lirë dhe të hapur.
Data 21 qershor nuk është zgjedhur rastësisht. Ajo përkon me solsticin e verës, një moment simbolik që shënon kulmin e dritës natyrore. Ky ekuilibër mes natyrës dhe kohës është parë si metaforë e harmonisë që muzika krijon mes njerëzve, kulturave dhe komuniteteve të ndryshme.
Me moton e njohur franceze “Faites de la musique” – “Bëni muzikë”, iniciativa u përhap me shpejtësi përtej kufijve të Francës. Sot, Dita Botërore e Muzikës festohet në më shumë se 120 vende, duke u kthyer në një nga ngjarjet kulturore më të mëdha ndërkombëtare.
Thelbi i kësaj dite është i thjeshtë: muzika duhet të jetë e aksesueshme për të gjithë. Për këtë arsye, në sheshe, rrugë, parqe dhe hapësira publike organizohen koncerte falas, performanca spontane dhe aktivitete artistike që sjellin pranë publikut çdo lloj zhanri muzikor.
Edhe në Shqipëri, Dita Botërore e Muzikës shënohet çdo vit me aktivitete kulturore, koncerte të hapura dhe iniciativa artistike të organizuara nga institucionet kulturore dhe pushteti vendor. Tirana dhe qytete të tjera bëhen skena të hapura ku artistët dhe publiku bashkohen në një atmosferë feste.
Nga Parisi në Nju-Jork, nga Roma në Tokio, kjo ditë mbledh nën të njëjtën frymë muzikën klasike, jazz-in, rock-un, muzikën popullore, atë alternative dhe zhanre të tjera që pasqyrojnë diversitetin kulturor të botës.
Më shumë se një festë, Dita Botërore e Muzikës është një kujtesë se muzika mbetet një gjuhë universale, e aftë të kapërcejë kufijtë, gjuhët dhe dallimet, duke krijuar ura komunikimi dhe mirëkuptimi mes njerëzve.
Burimi: atsh
