Kompania franceze e teknologjisë Mistral AI ka njoftuar lançimin e modelit të saj më të ri të inteligjencës artificiale, të quajtur “Le Chonk”, një teknologji e projektuar veçanërisht për bizneset, institucionet dhe përdoruesit që kërkojnë të mbajnë private informacionet e tyre.
Modeli, i njohur zyrtarisht si Mistral Large 4, pritet të bëhet publik më 27 tetor dhe është produkti i parë i ri i kompanisë pas pesë muajsh.
Ndryshe nga modelet e mbyllura të inteligjencës artificiale të kompanive amerikane si OpenAI dhe Anthropic, modeli i ri i Mistral do të ofrohet me parametra të hapur (open-weight). Kjo do të thotë se përdoruesit mund ta shkarkojnë, ta përshtatin sipas nevojave dhe ta përdorin në serverët apo pajisjet e tyre, pa qenë të detyruar t’i dërgojnë të dhënat në infrastrukturën e kompanisë që e ka zhvilluar.
Kjo veçori konsiderohet e rëndësishme për organizatat që përpunojnë informacione konfidenciale, përfshirë institucionet shtetërore dhe kompanitë që kërkojnë kontroll më të madh mbi të dhënat dhe sistemet e tyre.
Mistral ka njoftuar gjithashtu se ekspertët e sigurisë kibernetike dhe autoritetet qeveritare do të kenë akses në një version të modelit me më pak kufizime sigurie, për të testuar aftësitë dhe rreziqet e tij.
Prezantimi vjen vetëm një muaj pasi kompania franceze siguroi 3 miliardë euro financim, në atë që u cilësua si mbledhja më e madhe e kapitalit për një kompani teknologjike në Europë.
Drejtori ekzekutiv i Mistral, Arthur Mensch, deklaroi gjatë një aktiviteti në Abu Dhabi se modeli i ri arrin rezultate më të mira se disa prej konkurrentëve kinezë, veçanërisht në fusha që lidhen me sigurinë kibernetike.
“Modeli ynë është në fakt mbi modelet kineze në disa fusha”, tha Mensch, pa specifikuar se cilave sisteme u referohej.
Ai kundërshtoi gjithashtu idenë se Europa nuk mund të konkurrojë me fuqitë kryesore të inteligjencës artificiale. “Narrativa se Europa nuk mund të konkurrojë nuk është e vërtetë”, deklaroi drejtuesi i kompanisë.
E themeluar vetëm tre vjet më parë, Mistral është shndërruar në një nga kompanitë kryesore europiane të inteligjencës artificiale, duke u pozicionuar si një alternativë ndaj gjigantëve amerikanë dhe konkurrentëve kinezë.
Me modelin e ri, kompania synon të forcojë praninë në tregun e sistemeve të inteligjencës artificiale që mund të përdoren në infrastrukturë private, në një kohë kur kontrolli mbi të dhënat dhe pavarësia teknologjike janë bërë çështje gjithnjë e më të rëndësishme për Europën.
Burimi: Deutsche Welle / AFP / Reuters
