Finalja e Kupës së Botës 2026 mes Spanjës dhe Argjentinës, që zhvillohet sonte, nuk do të vendosë vetëm kampionen e re të botës. Përballja pritet të hyjë në histori edhe për rekordet e shumta që mund të vendosen nga të dyja skuadrat dhe nga dy yjet e saj, Lionel Messi dhe Lamine Yamal.
Ja 10 momentet historike që mund të shënohen në këtë finale:
Argjentina synon të mbrojë titullin pas 64 vitesh
Nëse fiton, Argjentina do të bëhet kombëtarja e parë që mbron titullin botëror që nga Brazili i viteve 1958 dhe 1962. Deri më sot, vetëm Italia dhe Brazili kanë arritur të fitojnë dy Botërorë radhazi.
Titulli i katërt botëror për Argjentinën
“Albiceleste” ka fituar Kupën e Botës në vitet 1978, 1986 dhe 2022. Një sukses ndaj Spanjës do t’i jepte trofeun e katërt, duke barazuar Gjermaninë dhe Italinë. Vetëm Brazili do të mbetej përpara me pesë tituj.
Spanja mund të vendosë rekord evropian
Spanja mbërrin në finale me 37 ndeshje radhazi pa humbje, duke barazuar rekordin e Italisë. Nëse nuk mposhtet nga Argjentina gjatë kohës së rregullt ose shtesës, do të vendosë rekordin e ri evropian me 38 ndeshje pa humbje.
Messi mund të bëhet golashënuesi më i vjetër në një finale Botërori
Në moshën 39 vjeç e 25 ditë, Lionel Messi mund të vendosë një rekord të ri nëse shënon në finale. Rekordi aktual mbahet nga suedezi Nils Liedholm, i cili realizoi gol në finalen e vitit 1958 në moshën 35-vjeçare.
Messi mund të thellojë rekordin si golashënuesi më i mirë në historinë e Botërorëve
Messi është tashmë golashënuesi më i mirë në historinë e Kupës së Botës me 21 gola. Një tjetër realizim do ta çonte në kuotën e 22 golave, duke u shkëputur edhe më shumë nga ndjekësi i tij, Kylian Mbappé, që numëron 19.
Rekord i ri me gola në 10 ndeshje radhazi
Kapiteni argjentinas ka shënuar në nëntë ndeshje radhazi të Botërorit, një rekord i paprecedentë. Nëse realizon gol edhe ndaj Spanjës, do ta çojë serinë në 10 takime.
Një tjetër rekord për numrin e finaleve
Messi mban tashmë rekordet për numrin më të madh të paraqitjeve dhe ndeshjeve si kapiten në historinë e Botërorit. Finalja e së dielës do ta bëjë vetëm lojtarin e dytë në histori, pas brazilianit Cafu, që luan në tre finale të Kupës së Botës.
Lamine Yamal pranë historisë
Nëse Spanja fiton, Lamine Yamal, që mbushi 19 vjeç gjatë turneut, do të bëhet një nga kampionët më të rinj të botës në histori, duke u renditur mes emrave legjendarë të futbollit. Rekordi absolut vazhdon të mbahet nga Pelé, i cili fitoi Botërorin në moshën 17-vjeçare.
Argjentina mund të zgjasë serinë rekord pa humbje
Argjentina ka arritur në 13 ndeshje radhazi pa humbje në Kupën e Botës, seria më e gjatë në historinë e saj. Nëse nuk humbet finalen para një gjuajtjeje të mundshme penalltish, do ta çojë këtë rekord në 14 ndeshje.
Botërori më i madh në histori
Finalja Spanjë–Argjentinë do të jetë ndeshja e 104-t e këtij Botërori, duke e bërë edicionin 2026 turneun më të madh të organizuar ndonjëherë. Për herë të parë morën pjesë 48 kombëtare, me ndeshje të zhvilluara në 16 qytete të tre vendeve organizatore.
