Kombëtarja e Iranit do të marrë pjesë në Kupën e Botës 2026, por me një organizim të pazakontë: futbollistët iranianë do të qëndrojnë në Meksikë dhe do të udhëtojnë drejt SHBA-së vetëm në ditët e ndeshjeve.
Lajmi u konfirmua nga presidentja e Meksikës, Claudia Sheinbaum, e cila deklaroi se FIFA iu drejtua autoriteteve meksikane pasi SHBA nuk pranoi që skuadra iraniane të qëndronte gjatë gjithë turneut në territorin amerikan.
“Ne nuk kemi asnjë arsye t’u mohojmë mundësinë për të qëndruar në Meksikë”, deklaroi Sheinbaum gjatë një konference për shtyp.
Irani është pjesë e Grupit G dhe do të zhvillojë tre ndeshje në Shtetet e Bashkuara:
- ndaj Zelandës së Re në Los Angeles më 15 qershor,
- kundër Belgjikës më 21 qershor po në Los Angeles,
- dhe ndaj Egjiptit në Seattle më 26 qershor.
Sipas kreut të Federatës Iraniane të Futbollit, Mehdi Taj, baza e ekipit është zhvendosur nga Arizona në qytetin kufitar meksikan Tijuana, pranë kufirit me SHBA-në. FIFA e konfirmoi zyrtarisht këtë ndryshim.
Taj tha se kjo zgjidhje do të shmangë komplikacionet me vizat dhe do të lejojë gjithashtu fluturime direkte të Iran Air drejt Meksikës.
Situata u bë e ndjeshme pas përshkallëzimit të konfliktit mes SHBA-së, Izraelit dhe Iranit në muajt e fundit, gjë që ngriti pikëpyetje nëse Teherani do të merrte pjesë apo jo në Botërorin që zhvillohet në SHBA, Kanada dhe Meksikë.
Presidenti amerikan Donald Trump kishte deklaruar në mars se Irani ishte “i mirëpritur” të luante në Botëror, por shtoi se nuk mendonte se ishte “e përshtatshme për sigurinë e tyre” që skuadra të qëndronte në SHBA gjatë turneut.
Pavarësisht tensioneve politike, FIFA vendosi të mos ndryshojë kalendarin e ndeshjeve dhe konfirmoi pjesëmarrjen e Iranit në kompeticion.
Irani siguroi kualifikimin për Kupën e Botës për herë të katërt radhazi pasi kryesoi grupin e tij në eliminatoret aziatike vitin e kaluar.
