Qeveria ka prerë fondet për hekurudhën, transportin detar, energjinë dhe burimet natyrore për të mbuluar nevojat e furnizimit me ujë dhe kanalizimeve.
Me vendimin nr. 765, datë 7 tetor 2026, Këshilli i Ministrave ka miratuar rishpërndarjen e 50 milionë e 37 mijë lekëve brenda buxhetit të Ministrisë së Infrastrukturës dhe Energjisë.
Sipas vendimit të botuar në Fletoren Zyrtare, goditjen më të rëndë e merr transporti detar, të cilit i hiqen 18 milionë e 655 mijë lekë.
Programi “Mbështetje për energjinë” humbet 12 milionë e 300 mijë lekë, “Mbështetje për burimet natyrore” 10 milionë e 82 mijë lekë, ndërsa transporti hekurudhor 9 milionë lekë.
E gjithë shuma, deri në lekun e fundit, kalon te programi “Furnizimi me ujë dhe kanalizime”, ku tavani i shpenzimeve korrente rritet me 50 milionë e 37 mijë lekë. Fjala është për shpenzime korrente, pra para për funksionimin e përditshëm të sektorit dhe jo për investime të reja.
Vendimi vjen kur viti buxhetor është drejt fundit dhe tregon se planifikimi i bërë në fillim të vitit nuk i ka mbijetuar realitetit. Ministria e Infrastrukturës dhe Energjisë, që i propozoi qeverisë këtë ndryshim, nuk ka dhënë asnjë shpjegim publik për arsyet e mungesës së fondeve te uji, as për pasojat që do të ketë shkurtimi në sektorët e tjerë.
Hekurudha, që prej vitesh pritet të funksionojë me premtime të shumta për rikonstruksion, mbetet sërish ndër zërat e parë ku qeveria fut dorën. Po kështu edhe transporti detar, në një vend me rreth 400 kilometra vijë bregdetare.
