Pas një vere ku Shqipëria kaloi nga protestat masive te zjarret që përpinë zona të tëra, e te debatet e njëpasnjëshme politike, Presidenti Bajram Begaj është bërë i gjallë por me një mesazh të gjatë për sesionin e ri parlamentar.
Jo se gjatë këtyre muajve Presidenti ka qenë krejt i zhdukur. Më 24 qershor, pas 25 ditësh protesta, reagoi për herë të parë duke kujtuar të drejtën e qytetarëve për t’u shprehur; më 12 gusht foli edhe për zjarret, duke falënderuar zjarrfikësit dhe kërkuar ndëshkimin e zjarrvënësve. Ndërkohë, axhenda presidenciale vijoi me dekrete, panaire libri, vizita jashtё shtetit e takime diplomatike, meqё zyra e vet vazhdon ende nё rikonstruksion dhe stafi i shkon nё punё 1 herё nё javё.
Por në rreth 100 ditët e fundit, vendi nuk ka kaluar thjesht një verë protokollare. Protestat që nisën në fund të majit u kthyen në një valë të paprecedentë qё nuk gjetёn kurrё njё reagim tё sinqertё tё Kreut tё Shtetit.
Sot, megjithatë, Begaj e ka gjetur momentin për një mesazh të plotë politik. Dhe tonin e ka optimist.
“Shqipëria është sot një vend me ambicie të mëdha dhe me një shoqëri që merr pjesë gjithnjë e më shumë në jetën publike”, thotë Presidenti, duke shtuar se është “inkurajuese kur zëri i qytetarëve gjen hapësirë në debatin publik dhe merr vëmendjen e institucioneve”.
Një formulim elegant për një verë në të cilën zëri i qytetarëve nuk u kufizua tamam te “debati publik”, por doli si kurrё mё parё në rrugë, pёr ditё pёr 100 ditё rresht.
Begaj i kujton Kuvendit se duhet të jetë “përfaqësues, funksional dhe llogaridhënës”, flet për shtetin e së drejtës, korrupsionin, zgjedhjet, reformën territoriale dhe integrimin europian. Madje ndalet posaçërisht te drejtësia, duke cilësuar rezultatet e SPAK-ut “një nga arritjet më të rëndësishme” të reformës.
Në fund vjen edhe urimi presidencial: që sesioni i ri të sjellë “bashkëpunim”, të forcojë institucionet dhe “besimin e qytetarëve te politika dhe shteti”.
Pas verës që lamë pas, kjo e fundit është ndoshta pjesa më ambicioze e gjithë fjalimit.
Gjithsesi, Presidenti u gjet. Kuvendi mund ta nisë punën i qetë: Begaj i tha “punë të mbarë”.
